U Barysavie ŭčastkovyja milicyjanty miesiac admaŭlajucca vychodzić na pracu: «Emacyjna vyharali»
Za apošni miesiac piać supracoŭnikaŭ milicyi Barysaŭskaha RUUS napisali zajavy na zvalnieńnie, ale kiraŭnictva nie śpiašajecca ich padpisvać. Niekatoryja maładyja śpiecyjalisty źviazanyja kantraktami na piać hadoŭ i, syjšoŭšy z orhanaŭ unutranych spraŭ, pavinny buduć vypłacić dziaržavie pa 10 tysiač dalaraŭ. Ale navat heta ich nie spyniaje. A raz zajavy kiraŭnictva nie padpisvaje, jany siadziać doma i čakajuć, pakul ich zvolniać za prahuły.
— Ciapier hetaja situacyja staranna chavajecca, kab nie ŭźnikła takoha rezanansu, jak u Kryčavie, — raspaviadaje TUT.BY supracoŭnik pravaachoŭnych orhanaŭ, jaki dobra viedaje historyju ŭ Barysavie. — Sprava ŭ tym, što za apošni miesiac 5 dziejnych supracoŭnikaŭ Barysaŭskaha RUUS pasprabavali zvolnicca, ale jak štat nie ŭkamplektavany, dyk milicyjantaŭ brakuje, stracić stolki čałaviek niedapuščalna. Tamu kiraŭnictva nie padpisvaje zajavy, prosta rvie i ŭsio.
Pa jaho słovach, supracoŭniki sprabujuć zvolnicca z-za pastajannych parušeńniaŭ pracoŭnaha zakanadaŭstva.
— Mahli sabrać u asabisty čas, syści z pracy svoječasova było nielha, dziažurnaja častka admaŭlałasia prymać zbroju i supracoŭnik užo nie moh pakinuć słužbu. Patrabavali pakazčyki, pahražali, kali nikoha nie zatrymaješ, zvolnim. Treba było kožny viečar zatrymlivać pjanic, kab ranicaj vadzić na kamisiju. Da taho ž kiraŭnictva admaŭlałasia davać adpačynak, kali pakazčyki byli nie tyja, — śćviardžaje supracoŭnik.
Jak daviedaŭsia TUT.BY z 14 červienia troje ŭčastkovych inśpiektaraŭ prosta pierastali vychodzić na pracu. Aficyjna — jany supracoŭniki milicyi, ale ŭ rečaisnaści — siadziać doma. Žurnalistam udałosia źviazacca ź niekatorymi, jany adrazu robiać ahavorku: «Nie było nijakaj zmovy, aficyjnaj skarhi na kiraŭnictva, kožny zachacieŭ syści sam pa sabie».
— Emacyjna vyharaŭ. Tak, nie vyjšaŭ na pracu. Prosta pryniaŭ takoje rašeńnie i davać jakija-niebudź kamientary ciapier podła, ja šeść hadoŭ prapracavaŭ u hetaj sistemie. Ciapier rasstaviŭ pryjarytety, siamja stała važniejšaj, — raspaviadaje adzin z učastkovych milicyjantaŭ.
Dvoje inšych jaho kaleh-učastkovych akazalisia ŭ bolš dalikatnaj situacyi. Chłopcy, maładyja śpiecyjalisty, jakija skončyli śpiecyjalizavanuju VNU, pavinny piać hadoŭ adpracavać pa kantrakcie. Pytańnie ŭ tym, što jany prapracavali ŭsiaho 2 hady. Kali zvolniacca, kožnamu pryjdziecca vypłacić pa 10 tysiač dalaraŭ. Mienavita stolki hrošaj było zatračana, pakul jany vučylisia na biudžecie i znachodzilisia na ŭtrymańni ŭ dziaržavy.
— Idzie słužbovaja pravierka, dakumienty pieradadzienyja ŭ Minsk. Navat nie viedaju: zvolnieny ja ŭžo aficyjna ci jašče nie, — kamientuje supracoŭnik Barysaŭskaha RUUS. — Škada, što nie dali pracavać. Ja śviadoma vybiraŭ hetuju prafiesiju. Čamu syšli? Nienarmavany pracoŭny dzień, vychadnyja zabirali, choć pa zakanadaŭstvie mohuć vyklikać tolki ŭ vypadku nadzvyčajnaj situacyi. I to heta tyčycca supracoŭnikaŭ MNS, bryhady chutkaj dapamohi, a nie ŭčastkovych milicyjantaŭ. Tak, mahčyma, niedzie byli kasiaki, dyk my maładyja, pakazčyki byli niadrennyja.
Adzin z učastkovych uspaminaje, kali pierastaŭ vychodzić na słužbu, jamu kiraŭnictva patelefanavała sa słovami: «Budź mužykom! Vychodź na pracu». Nie vyjšaŭ. Razam z učastkovymi zajavu na zvalnieńnie napisali jašče dva supracoŭniki RUUS. Adzin ź ich padpałkoŭnik. Jon 10 hadoŭ prapracavaŭ u milicyi, u mai padoŭžyŭ kantrakt, a ŭ červieni zachacieŭ syści. Niadaŭna ź im skasavali kantrakt pa zhodzie bakoŭ.
— Sapraŭdy, troje supracoŭnikaŭ Barysaŭskaha RUUS nie vychodziać na słužbu. Asnoŭnaja pryčyna — niežadańnie dobrasumlenna vykonvać słužbovyja abaviazki. Adznaču, što ŭsie hetyja supracoŭniki majuć dyscyplinarnyja spahnańni, u bolšaści vypadkaŭ za nienaležny razhlad zvarotaŭ i zajaŭ hramadzian. Pa fakcie prahułaŭ va ŭstanoŭlenyja terminy praviedziena słužbovaja pravierka. Supracoŭniki buduć zvolnienyja z orhanaŭ unutranych spraŭ. Barysaŭskaje RUUS pracuje ŭ štatnym režymie, — kamientuje Jaŭhien Sačak, aficyjny pradstaŭnik UUS Minskaha abłvykankama.
Kamientary