Unikalnyja dla Biełarusi vidy kulikoŭ (šyładziubka i chadułačnik) zahniaździlisia ŭ pojmie Prypiaci, paviedamiliŭ hramadskaj arhanizacyi «Achova ptušak Baćkaŭščyny» (APB).
Bližejšyja miescy hniezdavańnia šyładziubak — uźbiarežža Bałtyjskaha mora i zakinutyja karjery Lvoŭskaj vobłaści. Zimujuć hetyja ptuški na ŭźbiarežžy Mižziemnaha mora. Spačatku paru šyładziubak nazirali ŭ Biełarusi padčas viasnovaj mihracyi, ale paźniej było vyjaŭlenaje i hniazdo. Arnitołahi adznačajuć, što ptušaniaty ŭžo vyvielisia i ciapier asvojvajucca na turaŭskaj ziamli. Tak što hety fakt možna nazvać pieršym paćvierdžanym paśpiachovym hniezdavańniem šyładziubak u Biełarusi.
Pa susiedstvie z šyładziubkami ŭ Turavie možna nazirać i jak minimum try pary chadułačnikaŭ — redkich dla Biełarusi kulikoŭ ź niepraparcyjanalna doŭhimi nahami. U Biełarusi chadułačnik sioleta adznačany na Paleśsi adrazu ŭ niekalkich miescach. Z 1996 hoda arnitołahi redka, ale znachodzili hniozdy chadułačnikaŭ u Biełarusi. Jość infarmacyja, što adna para chadułačnikaŭ hniaździłasia ŭ Turavie ŭ 2013 hodzie. I ciapier chadułačniki stali hniezdavacca ŭ Biełarusi znoŭ.
«Abodva vidy — šyładziubka i chadułačnik — zastalisia hniezdavacca dziakujučy tamu, što sioleta Prypiać dobra raźliłasia viasnoj. Śniežnaja zima, vysoki ŭzrovień vady i pavolnaje padzieńnie viasnovaj pavodki zrabili mahčymym hniezdavańnie hetych vidaŭ u Turavie. Ptuški zatrymalisia, i było vidać, što jany pryhladajuć sabie miesca dla hniazda. U minuły raz chadułačnik hniaździŭsia ŭ Turavie ŭ 2013 hodzie taksama padčas dobraj pavodki. Raźlivy Prypiaci vielmi važnyja dla tysiač vodna-bałotnych ptušak, jakija spyniajucca na Turaŭskim łuzie, — adznačyŭ dyrektar Biełaruskaha centra kalcavańnia ptušak, staršy navukovy supracoŭnik łabaratoryi arnitałohii NPC pa bijaresursach NAN Biełarusi Pavieł Pinčuk. — Hetaj viasnoj šyładziubki i chadułačniki abhruntavalisia na dambach pamiž sažałkami, razam z kałonijaj račnych kryčak. Heta dobraje miesca dla hniezdavańnia, abaronienaje. Z adnaho boku, kryčki abaraniajuć źvierchu ad drapiežnikaŭ — bałotnaha łunia, šeraj varony, krumkača. Ź inšaha boku, da hetaha miesca nie dabiarucca takija drapiežniki, jak lisa, kunica, janotapadobny sabaka. Heta pavyšaje šancy na paśpiachovaje hniezdavańnie».
Hniezdavańnie hetych vidaŭ — jašče adzin dokaz važnaści raki Prypiać i Turaŭskaha łuha jak miesca spynieńnia i hniezdavańnia redkich vidaŭ ptušak.
U Biełarusi hniazdujučymisia ličacca 230 vidaŭ ptušak (usiaho ptušak — 329). Kali rehistracyja novych vidaŭ ptušak (naprykład, aroł-mahilnik abo sibirski čarnahałovy jerčyk) adbyvajecca pa dva-try razy ŭ hod, to ptuška, jakaja hniazdujecca — kudy bolš redkaja i važnaja padzieja ŭ śviecie arnitałohii. Apošniaja rehistracyja takich ptušak adbyłasia piać hadoŭ tamu: letam 2012 hoda paŭnočnuju marmytulu adznačyli ŭ Aršanskim rajonie.
Ciapier čytajuć
Tamara Vińnikava pradała svoj łondanski dom, zaviešany karcinami samoj siabie ŠMAT FOTA18
Kamientary