Suprać «darmajedskaha» dekreta prapanujuć zmahacca mabilnikami

Hamialčanin Juryj pa śpiecyjalnaści aŭtamiechanik, u 2014-m adsłužyŭ u vojsku, paśla słužby z pracaj nie pašancavała, ciapier ad jaho patrabujuć vypłacić 360 «darmajedskich» rubloŭ. Małady čałaviek zajaviŭ padatkovaj, što karystajecca mabilnym i Internetam, apłačvajučy hetyja pasłuhi, jon apłačvaŭ i padatak na dadanuju vartaść (PDV), a heta značyć, jaho nielha ličyć asobaj, «jakaja nie ŭdzielničała ŭ finansavańni dziaržvydatkaŭ».

Juryj ličyć, što i pracujučyja i nie pracujučyja hramadzianie źjaŭlajucca spažyŭcami tavaraŭ i pasłuh, u jakich užo zakładzienyja padatki, zbory i pošliny, a heta ni što inšaje, jak «vykanańnie kanstytucyjnaha abaviazku hramadzian pa ŭdziełu ŭ finansavańni dziaržaŭnych vydatkaŭ», jakoha patrabaje Dekret ab darmajedach.

«Liču, što normy Dekreta №3 ab pryznańni mianie płacielščykam zboru na finansavańnie dziaržvydatkaŭ da mianie nie dastasavalnyja, tak jak na praciahu ŭsiaho 2015 hoda ja ŭdzielničaŭ u finansavańni dziaržaŭnych raschodaŭ šlacham vypłaty PDV za karystańnie mabilnaj suviaźziu i internetam», — paskardziŭsia ŭ padatkovuju hamialčanin.

Małady čałaviek prosić inśpiekcyju MPZ pa Savieckim rajonie Homiela zapatrabavać ad mabilnaha apieratara «Vełkom» i ad pravajdera, pastaŭščyka pasłuhi Internet dadzienyja ab vypłačanych sumach PDV, paśla čaho vyklučyć jaho z bazy asob, jakija nie ŭdzielničajuć u finansavańni dziaržaŭnych raschodaŭ.

Pravavy inśpiektar prafsajuza rabotnikaŭ radyjoelektronnaj pramysłovaści (REP) pa Homielskaj vobłaści Leanid Sudalenka, jaki akazvaje jurydyčnyja pasłuhi pa «darmajedskich» pytańniach raić usim prysłuchacca da ŭźnikłaj inicyjatyvy.

«Kožny štodnia ździajśniaje kupli, apłačvaje pasłuhi, a heta značyć, apłačvaje padatki, pošliny i zbory. Ciažka dakazać, kolki tavaraŭ kožny z nas kupiŭ u 2015 hodzie, bo čeki nie imiannyja, dy nichto ich i nia zachoŭvaje. A voś vydatki pa apłacie pasłuh suviazi, Internet, vypłata roznych padatkaŭ i pošlin lohka praviarajucca i dakazvajucca», - nahadvaje prafsajuzny juryst.

«Čynoŭniki kažuć - nie pracujcie, ale padatki płacicie. My kažam - niepracujučyja aŭtaŭładalniki vypłačvajuć «zbor za darohi», akcyzny padatak i PDV pry kupli paliva, chtości ziamielny padatak, sudovuju abo nataryjalnuju pošlinu. Usie hetyja płaciažy źjaŭlajucca «vykanańniem kanstytucyjnaha abaviazku hramadzian pa ŭdziełu ŭ finansavańni dziaržaŭnych raschodaŭ», a heta značyć, da takich ludziej normy Dekreta №3 nie dastasavalnyja», - upeŭnieny juryst.

• 0
• 0
• 0
• 0
• 0
• 0
• 0
• 0