Prakuror prosić dla byłoha futbolnaha funkcyjaniera Žukava piać hadoŭ kałonii

Prakuror Maksim Čuprys prosić sud pryhavaryć byłoha futbolnaha funkcyjaniera Andreja Žukava da piaci hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści, zabaronaj zajmać pasady, źviazanyja z vykanańniem arhanizacyjna-rasparadčych abaviazkaŭ i jurydyčna značnych dziejańniaŭ, terminam na piać hadoŭ i štrafam u pamiery 500 bazavych vieličyń.

Vystupajučy 30 śniežnia ŭ sprečkach u sudzie Centralnaha rajona Minska, pradstaŭnik dziaržabvinavačańnia vykazaŭ upeŭnienaść u tym, što vina Žukava dakazanaja.

Były dyrektar departamienta sudziejstva i inśpiektavańnia asacyjacyi «Biełaruskaja fiederacyja futboła», staršynia kamisii pryznačeńniaŭ fiederacyi abvinavačvajecca pa šaści epizodach atrymańnia chabaru (č. 1 i 2 art. 430 KK) ad arbitraŭ i treniera ŭ siezonie-2014/2015 i 2015/2016 za pryznačeńnie na kankretnyja matčy vyšejšaj i pieršaj lihi Kubka Biełarusi pa futbole kankretnych sudździaŭ i ŭ pieravyšeńni ŭłady (č. 2 art. 426 KK). Vinu va ŭčynieńni hetych złačynstvaŭ Žukaŭ pryznaŭ całkam, adnak ad dačy pakazańniaŭ u sudzie admoviŭsia.

Dakazanaść viny Žukava Čuprys abhruntavaŭ tym, što sam abvinavačvany zhodny, što ŭčyniaŭ inkryminavanyja jamu dziejańni i napisaŭ jaŭku z pavinnaj. Akramia taho, prakuror adznačyŭ pakazańni na papiarednim śledstvie i ŭ sudzie arbitraŭ i treniera, jakija pieradavali funkcyjanieru hrošy, ich zajavy ab pryciahnieńni Žukava da kryminalnaj adkaznaści.

Toj fakt, što adzin ź ich u sudzie admoviŭsia ad dadzienych na śledstvie pakazańniaŭ i skazaŭ, što zajava była im napisana pad naciskam, prakuror patłumačyŭ imknieńniem śviedki abialić siabie, uśviedamlajučy, što jon taksama ŭčyniŭ złačynstva — daŭ chabar.

Pieršy złačynny epizod adnosicca da 4 kastryčnika 2014 hoda, apošni — 7 červienia 2016-ha. U abvinavačańni fihurujuć sumy ŭ 100 i 200 dołaraŭ, 100 jeŭra, 50 denaminavanych rubloŭ i butelka kańjaku «Ararat».

Kažučy pra pieravyšeńnie Žukavym paŭnamoctvaŭ, prakuror źviarnuŭ uvahu suda na toje, što ŭdzieł členaŭ kamisii pryznačeńniaŭ fiederacyi ŭ pryznačeńni arbitraŭ byŭ farmalnym. Žukoŭ, pavodle jaho słoŭ, ažyćciaŭlaŭ rasstanoŭku sudziejskaha składu adnaasobna, nasupierak usim instrukcyjam, pryčym z karyślivaj zacikaŭlenaści.

Pa prośbie abarony da materyjałaŭ spravy dałučana chadajnictva fiederacyi futboła ab maksimalnaj pabłažcy da Žukava, jaki ŭžo pakarany pa linii ABFF — jon abvieščany piersonaj non hrata ŭ futbole. Fiederacyja paprasiła sud pryznačyć Žukavu pakarańnie nižejšaje za najnižejšuju miažu, nie źviazanaje z pazbaŭleńniem voli, a kali heta niemahčyma — minimalnaje pakarańnie, praduhledžanaje za ŭčynienyja im złačynstvy.

Siońnia ž u sudzie stała viadoma, što žonka Žukava pahasiła inkryminavanuju jamu škodu. Daviedka ab pieraličeńni 912 rubloŭ była dałučanaja da spravy.

• 0
• 0
• 0
• 0
• 0
• 0
• 0
• 0