7 śniežnia Viciebski abłasny sud vynies prysudy traim aršancam, jakija hod tamu ździejśnili žorstkaje złačynstva.
Ciaham dvuch dzion, 26 i 27 śniežnia 2015 hoda, troje maładzionaŭ pad ałkaholem i psichatropami źbivali i hvałtavali žančynu. Były sužyciel pasprabavaŭ jaje vyratavać — jaho źbili da śmierci.
26 śniežnia 2015 hoda 24-hadovaja žycharka Oršy paznajomiłasia ŭ sacyjalnaj sietcy z maładym čałaviekam. Toj prapanavaŭ sustrecca, žančyna pahadziłasia. Novy znajomy vysłaŭ pa žančynu taksoŭku i paprasiŭ pryjechać u hości na kvateru da svajho znajomaha.
Na toj kvatery jon byŭ nie adzin, a z dvuma siabrami. Mužčyny, jak vyśvietliła śledstva, užyvali ałkahol i psichatropnyja rečyvy. I kali da ich pryjechała žančyna — jaje pačali źbivać i hvałtavać. Ciahnułasia heta z 19 hadziny viečara pa 11 hadzinu ranicy.
Ale ž žančyna zmahła adpravić SMS z prośbaj ab dapamozie mužčynu, ź jakim raniej žyła ŭ hramadzianskim šlubie i mieła ahulnaje dzicia. Kali jon pryjechaŭ, kab zabrać žančynu, jaho žorstka źbili.
Sudova-miedycynskimi ekśpiertami ŭstanoŭlena, što paciarpiełamu było naniesiena nie mienš za 39 udaraŭ kułakami, nahami, draŭlanaj chakiejnaj kluškaj. Paciarpiełuju dziaŭčynu, jakaja pasprabavała pieraškodzić źbićciu svajho sužyciela, taksama źbili.
Ad atrymanych ciažkich cialesnych paškodžańniaŭ 23-hadovy mužčyna pamior na miescy zdareńnia. Kampanija vyniesła jaho trup u dvor i pakinuła na łavačcy pamiž damami, dzie jaho i znajšli miascovyja žychary.
Zatym, uśviedamlajučy, što žančyna — vidavočca zabojstva, jaje nieadnarazova sprabavali zadušyć. Ale mužčyny da kanca svoj namier nie daviali. Paśla hetaha ŭsie troje pasnuli i žančyna zdoleła vyjści z kvatery na vulicu i źviarnułasia ŭ milicyju. Złačyncaŭ zatrymali. Troje maładzionaŭ, 24-ch, 27-mi i 29-hadoŭ (na momant złačynstva) nidzie nie pracavali.
U vyniku, na vyjaznym pasiedžańni Viciebski abłasny sud pryznaŭ usich traich vinavatymi ŭ hrupavym zabojstvie z asablivaj žorstkaściu, u hrupavym zamachu na zabojstva; u zhvałtavańni.
Dvoje mužčynaŭ atrymali 25 hadoŭ pazbaŭleńnia voli, treci — 25 hadoŭ i šeść miesiacaŭ. Usie jany buduć adbyvać pieršyja 5 hadoŭ u turmie, reštu — u kałonii ŭzmocnienaha režymu.
Taksama z abvinavačanych budzie spahnanaja hrašovaja suma na karyść paciarpiełaj.
Ciapier čytajuć
Žančyny ŭ achovie i braniavany kartež. Jak Ukraina arhanizavała biaśpieku vizitu Cichanoŭskaj u Kijeŭ11
Kamientary