U novym, 84-m, siezonie Nacyjanalnaha dziaržaŭnaha Vialikaha teatra opiery i baleta hledačoŭ čakajuć šeść premjer, paviedamiŭ na pres-kanfierencyi ŭ Minsku 1 vieraśnia hienieralny dyrektar teatra Uładzimir Hrydziuška.
Pieršaja premjera adbudziecca 4 vieraśnia — opiera Mocarta «Viasielle Fihara» ŭ pastanoŭcy rasijskaha režysiora Michaiła Kiślarova.
21 vieraśnia na biełaruskuju scenu viartajecca šedeŭr baletnaha mastactva «Pachita» Ludviha Minkusa, raskazaŭ Hrydziuška.
Jon taksama źviarnuŭ uvahu na toje, što 8 vieraśnia ŭ opiery «Carskaja niaviesta» Rymskaha-Korsakava praśpiavaje ŭładalnica zvańnia lepšaj śpiavački śvietu, biełaruska Nadzieja Kučar.
Artysty razam z chareohrafam Alaksandraj Cichamiravaj pracujuć nad adnaaktovym baletam «Saniety» Pitera Uorłaka i Ralfa Voan-Uiljamsa. Jaho premjera adbudziecca 1 śniežnia. Zatym Vialiki pradstavić novuju sceničnuju redakcyju «Toski» Pučyni.
U śniežni na scenie teatra tradycyjna projduć minski mižnarodny Kaladny konkurs vakalistaŭ (7—13 śniežnia) i minski mižnarodny Kaladny opierny forum (14—20 śniežnia), na jaki zaprošany Adeski nacyjanalny akademičny teatr sa śpiektaklem «Pikavaja dama».
U noč z 13 na 14 studzienia prychilniki opiernaha mastactva zaprašajucca na Vialiki bal.
U sakaviku pa-novamu zahučyć «Čaroŭnaja flejta» Mocarta, jakuju stavić jeŭrapiejski režysior i pradziusar, prezident Drezdenskaha opiernaha balu i dyrektar mižnarodnaha konkursu vakalistaŭ Competizione dell'Opera Chans-Joachim Fraj.
U ramkach «baletnyja leta ŭ Vialikim» hledačoŭ čakaje jašče adna premjera, suśvietnaja, - zusim novy balet Michaiła Kryłova «Or i Ora».
Hrydziuška taksama raskazaŭ pra novyja prajekty na nastupnyja siezony. Adpracoŭvajecca pytańnie ab pastanoŭcy śpiektakla «Anastasija Słuckaja». Pačynajecca praca nad «Travijataj», premjera adbudziecca ŭ nastupnym vieraśni. Jašče adna zadumka Vialikaha — novaja viersija śpiektakla «Bahiema», jaki znachodzicca ŭ pieršaj trojcy suśvietnaha rejtynhu. Akramia taho, płanujecca sumiesnaja praca z češskim chareohrafam Iržy Kilijanam. Dalej u płanach — pastanoŭka śpiektaklaŭ na muzyku Štrausa «Sałamieja» i «Tak kazaŭ Zaratustra».
Taksama abdumvajecca mahčymaść pastanoŭki ŭ kłasicy śpiektakla «Karsar» pry ŭdziele adnaho ź lepšych baletmajstraŭ-repietytaraŭ Maryinskaha teatra Viačasłava Chamiakova.
-
U Homielskim dramatyčnym teatry — kadravyja čystki. Znoŭ praz «palityku»
-
«Budzie śmiešna i baluča»: «Kupałaŭcy» prezientujuć zaŭtra novy śpiektakl. U hałoŭnych rolach — Manajeŭ, Biełachvościk, Harcujeva
-
«Rašeńnie pryjšło zvonku». Što adbyvajecca ŭ viciebskim teatry, dzie ŭ śpiektakli prahučała «Žyvie Fłandryja!» i pačałasia čarada zvalnieńniaŭ?
Ciapier čytajuć
«Kajłas, ja idu». Što za biełaruska źnikła ŭ žudasnym sieli ŭ Niepale11
Kamientary