Łukašenka dazvoliŭ na hod zamarozić štrafnyja sankcyi dla inviestaraŭ pry ŭmovie zaviaršeńnia budaŭnictva abjektaŭ

Alaksandr Łukašenka padtrymaŭ prapanovu ab tym, kab zamarozić na hod štrafnyja sankcyi dla šeraha inviestaraŭ, jakija pa abjektyŭnych pryčynach nie zmahli ŭ termin dabudavać pačatyja abjekty. Heta pytańnie abmiarkoŭvałasia ŭ čas dakłada kiraŭniku dziaržavy staršyni Minskaha abłasnoha vykanaŭčaha kamiteta Siamiona Šapiry.

«Ja hatovy razhledzieć pytańni pa parušeńni dahavoraŭ pa budaŭnictvie inviestarami. Ale chaciełasia b, kab my, vyzvalajučy ich ad sankcyj pa niavykananych abaviazacielstvach, nie zrabili heta normaj. Tamu što my znoŭ atrymajem šmat niedabudaŭ. Paabiacali — treba ŭkładvacca ŭ terminy. Ale kali jość abjektyŭnyja pryčyny, viadoma, inviestaraŭ treba padtrymlivać, asabliva ciapier», — zajaviŭ Łukašenka.

Jak rastłumačyŭ žurnalistam Siamion Šapira, niekalki hadoŭ tamu ŭłady ŭ Minskaj vobłaści vyjavili najaŭnaść vialikaj kolkaści niedabudavanych inviestycyjnych abjektaŭ. U takich vypadkach, kali abjekt svoječasova nie pabudavany, naležała skasoŭvać dahavor, a inviestar pavinien byŭ by vypłacić usie vykarystanyja lhoty, u tym liku ŭ častcy padatkaŭ, ilhatavanych mytnych pošlin. «Dla taho kab nie hubić inviestaraŭ, my pajšli pa inšym šlachu. Paprasili dazvołu ŭ kiraŭnika dziaržavy ŭstanaŭlivać im dadatkovy termin dla zdačy abjekta, ale za heta naličalisia štrafy. Štrafaŭ my naličyli za ŭsie hetyja hady na Br42 młrd, jakija pajšli na adnaŭleńnie abłasnoj kliničnaj balnicy ŭ Baraŭlanach», — skazaŭ Šapira.

Pavodle jaho słoŭ, taki padychod byŭ bolš vyhadny dla biźniesu, čym skasavańnie dahavora i vypłata ŭsich naležnych niaŭstojek. «Siońnia ja paprasiŭ kiraŭnika dziaržavy, z ulikam, što niaprosty čas u biźniesu, dazvolić na hod zamarozić štrafy, i paprasić inviestaraŭ, kab hetyja abjekty byli na praciahu hoda dabudavany biez štrafaŭ. Ale kali za hod nie dabudujuć, tady prymianić da ich štrafnyja sankcyi za hety hod uklučna», — dadaŭ Siamion Šapira.

«Heta jak minimum 2-3 dziasiatki inviestaraŭ, — rastłumačyŭ staršynia Minabłvykankama. — Ludzi chočuć žyć u čystym, akuratnym asiarodździ, a kali viečnaja budoŭla, heta hramadzianam nie padabajecca. Tamu razmova idzie ab tym, kab chutčej padahnać biźniesmienaŭ zaviaršać pačatyja abjekty».

Jon dadaŭ, što adpaviednaja prapanova Łukašenkam padtrymanaja.

U čas dakłada kiraŭniku dziaržavy było ŭźniata i jašče adno pytańnie ab nievykanańni inviestarami svaich abaviazacielstvaŭ. «My niekali pieradali inviestaram subjekty haspadarańnia — kałhasy, saŭhasy — a niešta tam nie atrymałasia, i jany, za biascenak atrymaŭšy ŭłasnaść, pačynajuć pierapradavać užo ŭ try razy daražej pa tak zvanaj rynačnaj canie. Heta nieparadak. Heta nie prosta treba spynić ciapier, a zrabić tak, kab usio viarnuli nazad. Ja vas tut absalutna padtrymlivaju», — skazaŭ Alaksandr Łukašenka, źviartajučysia da Siamiona Šapiry.

U razmovie z žurnalistami staršynia adznačyŭ, što bolš jak dziesiać hadoŭ tamu amal 125 pradpryjemstvaŭ u Minskaj vobłaści byli pieradadzieny inviestaram, jak dziaržaŭnym, tak i pryvatnym pradpryjemstvam. «Na žal, niekatoryja pryvatnyja struktury na sielskahaspadarčyja pradpryjemstvy nie źviarnuli ŭvahi, a, naadvarot, stali adtul brać hrošy, pradavać niezavieršanyja abjekty, niejkija inšyja terytoryi, — kanstatavaŭ Šapira. — Hetyja haspadarki stali bankrutami. Na ščaście, ich niašmat, — 5-6 takich pradpryjemstvaŭ».

«Vidać, paśla siońniašniaha dakłada prezidentu źjavicca dakumient, na padstavie jakoha jany viernuć usio, što zabrali z hetych pradpryjemstvaŭ, što pierapradali pa rynačnych cenach. Tamu što jany prosta abiaskrovili pradpryjemstvy. U niekatorych užo i žyvioła pradadziena. Treba navieści paradak. Tam jość ludzi, kalektyvy, im treba žyć i pracavać», — padkreśliŭ Siamion Šapira.

• 0
• 0
• 0
• 0
• 0
• 0
• 0
• 0