Biełaruskija amatary sportu zmohuć ubačyć chakiejny čempijanat śvietu na troch telekanałach. Usie matčy zbornaj Biełarusi na stadyi hrupavoha etapu i ŭ vypadku vychadu ŭ płej-of budzie tranśliravać «Biełaruś 1», paviedamili ŭ pres-słužbie Biełteleradyjokampanii.
Biełaruskija chakieisty ŭ papiaredniaj hrupie V zhulajuć u Sankt-Pieciarburhu z kamandami Finlandyi (6 maja), ZŠA (7 maja), Kanady (9 maja), Słavakii (11 maja), Hiermanii (13 maja), Vienhryi (14 maja) i Francyi (17 maja).
Taksama na čas suśvietnaha čempijanatu na hałoŭnym telekanale krainy kožny viečar možna budzie ŭbačyć padrabiazny ahlad praviedzienych za dzień hulniaŭ. Maładziožny telekanał «Biełaruś 2» pradstavić uvazie telehledačoŭ hulni haspadaroŭ pieršynstva — zbornaj Rasii, jakija zaŭsiody vyklikajuć vialikuju cikavaść u biełaruskaj publiki. Razam z rasijanami ŭ hrupie A ŭ Maskvie vystupiać chakieisty Šviecyi, Čechii, Šviejcaryi, Łatvii, Narviehii, Danii i Kazachstana.
U efiry telekanała «Biełaruś 5» možna budzie sačyć za inšymi matčami čempijanatu. «Pakolki čas pačatku hulniaŭ u Maskvie i Sankt-Pieciarburhu budzie supadać, častku matčaŭ, viadoma, my pakažam u zapisie, ale pryjarytet pramych tranślacyj hałoŭnaha chakiejnaha turniru hoda nieasprečny. Ahlady matčaŭ buduć taksama vychodzić na telekanale «Biełaruś 5». Akramia taho, my budziem rychtavać tematyčnyja «Dziońniki čempijanatu». Zrazumieła, u Sankt-Pieciarburhu, dzie raźmieścicca naša zbornaja, budzie pracavać zdymačnaja hrupa «Biełaruś 5», tamu hledačam varta čakać ekskluzivu», — paabiacaŭ kiraŭnik spartyŭnaha telekanała Alaksandr Kaziukievič.
Ciapier čytajuć
Jak Ksiuša z SMA apynułasia ŭ Domie dziciaci pry žyvoj mamie? Voś što kaža sama maci1
Kamientary