Rabotniki viciebskaha AAT «Žyłbud» pierad nadychodam Novaha hoda sprabujuć pradać pa canie nižejšaj za naminał vydadzienyja im na pradpryjemstvie siertyfikaty dla kupli abutku i skurhałantarei «Marka» — niekalki takich abjaŭ źjaviłasia ŭ sacsietkach.
Redakcyja «Narodnych navin Viciebska» źviazałasia z uładalnikami hetych kuponaŭ. Adna z pracaŭnic budaŭničaj firmy raspaviała, što siertyfikaty na 800 000 rubloŭ im vydali na pradpryjemstvie, uziaŭšy pry hetym raśpiski ŭ atrymańni i zhodzie na toje, što hetaja suma budzie vyličanaja ź ich zarabotnaj płaty ciaham troch miesiacaŭ.
Pavodle infarmacyi na siertyfikatach, ich možna vykarystoŭvać u firmovych kramach handlovaj sietki «Marka», pryčym jany buduć sapraŭdnyja tolki da 30 studzienia 2016 hoda. Dziakujučy tamu, što siertyfikaty nie imiannyja, mnohija sprabujuć ich pradać, zvyčajna vystaŭlajučy canu ŭ 700 000 rubloŭ, na 100 000 rubloŭ nižej za naminał. Častka ŭładalnikaŭ hetych kuponaŭ, nie spadziejučysia na prodaž praź internet, prapanujuć siertyfikaty pakupnikam prosta ŭ abutkovych kramach.
U sacyjalnych sietkach pad abjavami ab prodažy takich siertyfikataŭ viciablanie žartujuć, što, vidać, takim čynam «Marka» raźličyłasia z «Žyłbudam» za budaŭnictva novaha łahistyčnaha centra «OUTLET Marko».
Hety handlova-łahistyčny centr i centr rasprodažaŭ na Biešankovickaj šašy, raźmieščany na miescy byłoj vioski Paŭłavičy, byŭ uračysta adkryty 17 śniežnia. Budaŭnictva i asnaščeńnie novaha budynka abyšłosia ŭ 120 miljardaŭ rubloŭ.
Kamientary