Apublikavana VIDEA, jak milicyjant u Minsku vałače žabraka pa schodach za nahu, scena vyklikała vybuch hnievu ludziej u mietro
«Siońnia ja staŭ śviedkam biaspraŭja i ja prašu ŭ vas dapamohi! Ja vyjšaŭ ź mietro na stancyi Uručča prykładna a 16:03 i staŭ śviedkam taho, jak milicyja ździekavałasia sa ślapoha invalida! — napisaŭ karystalnik sacyjalnych sietak Kirył Kaŭhanaŭ. — Sa słovaŭ ludziej, jakija tam žyvuć, hety čałaviek amal kožny dzień siadzić u mietro i ŭsie jaho viedajuć i dapamahajuć jamu, i voś siońnia da jaho padyšli dva milicyjanty i stali bieź nijakich padstaŭ da jaho čaplacca, i jon, nie razumiejučy, što adbyvajecca, daŭ adpor i padrapaŭ ruku milicyjantu (na fota ŭ čornaj formie) i jany pačali jaho rezka padymać i ŭžyvać suprać jaho siłu! Niahledziačy na ŭsio abureńnie naroda, jany praciahvali jaho vałačy i dalej pry ŭsich spuścili jaho sa schodaŭ i pra hetym ślapy čałaviek stuknuŭsia hałavoj ab žaleznyja poručy (ja prymacavaŭ uryvak ź videa, dzie ŭsio vidać, pry patrebie vykładu poŭnaje videa, jakoje pavinna trapić u adpaviednyja orhany). Ślapomu biezabaronnamu čałavieku nadzieli kajdanki jak na złačyncu i pavodzili siabie ź im tak, jak byccam jon nie čałaviek, a žyvioła! Šmat ludziej pahadzilisia advieści jaho dadomu, ale ŭ adkaz pačuli tolki admovy. My ŭsie byli aburanyja, a adna dziaŭčyna navat z płačam prasiła adpuścić jaho», — piša Kaŭhanaŭ.
U svaju čarhu, minskaja milicyja daje inšuju viersiju padziej. «Padčas dastaŭleńnia dadzienaha hramadzianina ŭ pakoj milicyi jon akazaŭ supraciŭ i, pavodle papiaredniaj infarmacyi, pakusaŭ dvuch supracoŭnikaŭ za ruki. I pry hetym hramadzianie prajavili, tak by mović, čullivaść i pasprabavali ŭmiašacca ŭ dziejańni milicyi. Kanflikt tam vyčarpany, i dadzieny hramadzianin dastaŭleny ŭ pakoj milicyi dla razboru», — raskazaŭ pres-sakratar HUUS Alaksandr Łastoŭski.
Pryčynieńnie cialesnych paškodžańniaŭ supracoŭnikam milicyi, adznačajuć u HUUS, sumnievaŭ nie vyklikaje.
Paźniej Śledčy kamitet paviedamiŭ, što žabrak nie hłuchaniamy, ale vydavaŭ siabie za hłuchaniamoha.
Čytajcie taksama:
Kamientary