Pavieł Znaviec: «Hajdukievič i Ciareščanka sabrali nie bolš za 2000 podpisaŭ, ražany ataman — uvohule»
Były deputat Viarchoŭnaha Savieta 13-ha sklikańnia Pavieł Znaviec udzielničaŭ va ŭsich prezidenckich kampanijach apošniaha času. U 2010 hodzie jon padtrymaŭ Jarasłava Ramančuka. Štodzionny pikiet Znaŭca znachodziŭsia na Kamaroŭskim rynku i sabraŭ 2655 podpisaŭ — rekord siarod demakratyčnych aktyvistaŭ. Jon miarkuje, što sioletnija kandydaty navat tearetyčna nie mohuć nabrać patrebnyja ličby.
«Naša Niva»: Spadar Pavieł, jak vy aceńvajecie zajavy Hajdukievičaŭ-Ciareščanak-Ułachovičaŭ, jakija śćviardžajuć, što sabrali patrebnyja 100 tysiač podpisaŭ?
Pavieł Znaviec: U 2006 hodzie tre' było štampavać padpisnyja listy ŭ rajvykankamach. I ŭ Maskoŭskim rajvykankamie ja za ruku złaviŭ, jak raskładvali listy za Łukašenku i pierapisvali dadzienyja ŭ listy za Hajdukieviča. Ja kažu: «Što ž vy robicie?» Jany mianie i vyhnali… Mnie zdajecca, ni ŭ adnu svaju kampaniju Hajdukievič nie sabraŭ bolš za 2000 podpisaŭ.
Što tyčycca Ciareščanki… Heta moj były kaleha pa Viarchoŭnym Saviecie. Pierš čym zadać pytańnie, jon dziesiać razoŭ prasiŭ prabačeńnia ŭ Łukašenki. Mnie zdajecca, realnych podpisaŭ Ciareščanka na siońnia sabraŭ maksimum 1—2 tysiačy. Nu, a ražany ataman — heta ŭvohule nul.
«NN»: A ŭ apazicyjnych palitykaŭ realnyja ličby?
PZ: U Karatkievič situacyja lepšaja, jakija-nijakija hrošy zborščykam padpłočvajuć. Ale ŭsie razumiejuć, što heta «fejkavaja» fihura.
Što da Kalakina i Labiedźki, ja liču, što jany kolkaść sabranych podpisaŭ pamnažajuć udvaja-utraja. Jany mohuć sabrać realnych 20 tysiač podpisaŭ, pry vielizarnych namahańniach — 30 tysiač. Ale spadziajusia, Kalakin i Labiedźka nie pojduć na čatyrochrazovy padman vybarščykaŭ i nie buduć udzielničać dalej.
«NN»: Vaš prahnoz: kolki pracentaŭ hałasoŭ atrymajuć kandydaty, jakija dojduć da vybaraŭ?
PZ: Ja čuŭ infarmacyju, što nibyta hajdukievičcy prapanoŭvali, kab jamu naličyli 10%, a ŭ Łukašenki było 70—75%. Ale ž Łukašenka choča 90%!
Kamientary