Labiedźka: Kali zarehistrujuć kandydatam, zdymusia na apošnim etapie vybaraŭ

Patencyjny kandydat u prezidenty, staršynia Abjadnanaj hramadzianskaj partyi Anatol Labiedźka 11 žniŭnia pabyvaŭ u Žłobinie, Buda-Kašalovie i Homieli, dzie ŭdzielničaŭ u pikietach pa zbory podpisaŭ u padtrymku svajho vyłučeńnia.

Pavialičyć

Pavodle słoŭ palityka, u jaho padtrymku sabrana bolš za 50 tys. podpisaŭ, ale ličby dla AHP nie hałoŭnaje.

«Źbiarem 100 tys. ci nie, istotna heta nie paŭpłyvaje na toje, što my budziem rabić. Dla nas hałoŭnaje ŭ hetaj kampanii — kamunikacyja ź ludźmi, nam važna danieści naša pasłańnie da jak maha bolšaj kolkaści ludziej, heta tyja dźviery, jakija pryadčynilisia, u jakija my ŭvajšli. Ja dumaju, što 12 kastryčnika hetyja dźviery začyniacca, i, pakul čas idzie, my hety čas vykarystoŭvajem», — rastłumačyŭ žurnalistam u Homieli Labiedźka.

Jon padkreśliŭ, što AHP u hetaj palityčnaj kampanii budzie absalutna sumlennaj i nie budzie sabie štości prypisvać — «atrymajecca jak atrymajecca». Minułyja palityčnyja kampanii, na dumku palityka, byli «vielmi kamiercyjalizavanyja». «My ŭpieršyniu sprabujem pravieści kampaniju, abapirajučysia vyklučna na tych ludziej, u jakich jość pierakanańni, jakija nie francuzski lehijon — pryjšoŭ, papracavaŭ i tabie zapłacili. My budziem vykarystoŭvać usie napracoŭki i na parłamienckuju kampaniju nadalej», — adznačyŭ patencyjalny kandydat.

Labiedźka taksama paviedamiŭ, što pry ŭmovie rehistracyi na apošnim etapie vybaraŭ budzie zdymać svaju kandydaturu.

Ad naviedvańnia Žłobina ŭ palityka, pavodle jaho słoŭ, zastalisia pazityŭnyja ŭražańni. Jon pahutaryŭ z pradprymalnikami na miascovym rynku. Za paŭtary hadziny na handlovym abjekcie členy jaho inicyjatyŭnaj hrupy sabrali 36 podpisaŭ. U Buda-Kašalovie podpisaŭ sabrali mienš. «Pad naš pryjezd tam pastavili pikiet imia Alaksandra Ryhoraviča, jaki stajaŭ roŭna stolki, kolki i my tam byli», — zaŭvažyŭ palityk. Pavodle słoŭ namieśnika staršyni AHP Vasila Palakova, u rajcentry adčuvałasia niejkaja zapužanaść i strach: «Ludzi padychodzili, stavili podpisy, ale bajalisia, kab nichto hetaha nie bačyŭ.

Žurnalisty ŭ Homieli pacikavilisia staŭleńniem staršyni AHP da dvornikaŭ — u materyjale «Jeŭraradyjo» była infarmacyja, što palityk nie vitajecca z dvornikami ŭ svaim dvary. «U mianie adna dvorničycha, dastatkova maładaja asoba. Uličvajučy maju śpiecyfiku, hetaja žančyna, jak by skazać dypłamatyčna, dapamahaje siłavym strukturam roznaj infarmacyjaj — kali ja pryjšoŭ i pajšoŭ. Chacia na mianie heta nijak nie ŭpłyvaje, ja razumieju, što mnohich siońnia mohuć prymusić štości rabić, ale kanfliktaŭ u mianie z dvornikam abo z kim-niebudź u padjeździe nie było», — padkreśliŭ Labiedźka.

• 0
• 0
• 0
• 0
• 0
• 0
• 0
• 0