Adpaviednaja rezalucyja była adnahałosna pryniata 21 lutaha ŭ miežach čarhovaj siesii Eŭraparlamenta ŭ Strasburhu.
Jeŭraparłamientaryi vykazali «hłybokaje škadavańnie» ŭ suviazi z tym, što situacyja ŭ śfiery demakratyi, pravoŭ čałavieka i viaršenstva zakonu ŭ Biełarusi nie palapšajecca, «idzie ŭrazrez z apošnimi zajavami biełaruskaha ŭrada ab hatoŭnaści palepšyć adnosiny ź Jeŭrasajuzam».
U rezalucyi asudžajucca aryšty i adličeńni z univiersitetaŭ aktyvistaŭ apazicyi, jakija pačalisia za akcyjaj salidarnaści 16 studzienia ŭ Minsku. Aprača taho, jeŭradeputaty asudzili toj fakt, što Biełaruś — adzinaja kraina ŭ Jeŭropie, dzie datehul prymianiajecca pakarańnie śmierciu. U dakumiencie ŭtrymlivajecca zaklik da aficyjnaha Minska spynić pieraśled apazicyi.
Razam z tym Jeŭraparłamient vitaŭ daterminovaje vyzvaleńnie niekatorych apazicyjnych palitykaŭ, a taksama rašeńnie biełaruskich uładaŭ ab adkryćci ŭ Minsku pradstaŭnictva Jeŭrakamisii. Pry hetym u rezalucyi nahadvajecca, što ŭmovy dla ŭklučeńnia Biełarusi ŭ Jeŭrapiejskuju palityku dobrasusiedstva byli akreśleny ŭ stratehii ES u listapadzie 2006 hoda.
Jeŭrapiejskija deputaty taksama vykazalisia za nieabchodnaść prytrymlivacca standartaŭ ABSIE pry arhanizacyi kampanii pa vybarach u parłamient, jakaja projdzie ŭ Biełarusi vosieńniu 2008 hoda. U pryvatnaści, padkreślivajecca nieabchodnaść dać pradstaŭnikam apazicyi dostup da vybarčych kamisij, zarehistravać usich kandydataŭ i ich naziralnikaŭ, nie stvarać pieraškod dziejnaści mižnarodnaj naziralnaj kamisii.
Jeŭraparłamient vykazaŭ salidarnaść z ab\jadnanymi demakratyčnymi siłami Biełarusi i «ŭsimi biełarusami, chto imkniecca da niezaležnaj, adkrytaj, demakratyčnaj Biełarusi, zasnavanaj na viaršenstvie zakonu».
Deputaty Jeŭraparłamienta zaklikali Kamisiju i Saviet Jeŭrasajuza razhledzieć mahčymaść zrabić šenhienskija vizy dla biełarusaŭ biaspłatnymi. Pavodle mierkavańnia parłamientaryjaŭ, krainy — členy Šenhienskaha dahavora pavinny vykarystoŭvać usie mahčymyja instrumienty, u tym liku nacyjanalnyja vizy, kab ablehčyć pieramiaščeńnie biełarusaŭ unutry kožnaj z krain, asabliva — dla dziaciej va ŭzroście mienš za šeść hadoŭ, vučniaŭ, studentaŭ, aśpirantaŭ, navukovych rabotnikaŭ.
Jeŭraparłamient taksama zaklikaje ŭsiu mižnarodnuju supolnaść akazvać bolš značnuju dapamohu biełaruskaj hramadzianskaj supolnaści — pavialičyć finansavuju padtrymku niezaležnych ŚMI Biełarusi, niaŭradavych arhanizacyj i biełaruskich studentaŭ, jakija vučacca za miažoj.
Tekst rezalucyi pa Biełarusi budzie nakiravany ŭ Saviet i Kamisiju ES, parłamienty i ŭrady 27 krain — členaŭ Jeŭrasajuza, hienieralnamu sakrataru AAN, u parłamienckija asamblei ABSIE i Savieta Jeŭropy, a taksama biełaruskim uładam.
Ciapier čytajuć
Anžaliku Mielnikavu bačyli ŭ Minsku ŭ «Dana Mole»49
Kamientary