Na Maładziečanskim zavodzie mietałakanstrukcyj narešcie vypłacili zarpłatu za maj

Rabotniki Maładziečanskaha zavoda mietałakanstrukcyj atrymali ŭsiu zarpłatu za maj, jak i abiacaŭ raniej vykanaŭca abaviazkaŭ hienieralnaha dyrektara Dźmitryj Kupryjanaŭ.

Prablemy z vypłataj zarpłaty na zavodzie pačalisia bolš za miesiac tamu. Zhodna z kantraktam zarpłata vypłačvajecca 21-ha dnia kožnaha miesiaca. Nie atrymaŭšy raźlik za krasavik, 8 červienia rabočyja naładzili stychijnuju zabastoŭku. Hrošy im vypłacili tolki 12 červienia paśla pryjezdu na zavod staršyni Minskaha abłvykankama Siamiona Šapiry.

Paźniej ŭ rabočych uźnikli prablemy z atrymańniem zarpłaty za maj. Nie ažyćciaviŭšy raźlik za maj 21 červienia, Dźmitryj Kupryjanaŭ paprasiŭ rabočych pačakać da kanca miesiaca. Adnak zarpłatu vypłacili navat raniej — 26 červienia, paviedamiŭ BiełaPAN hazarezčyk pradpryjemstva Dźmitryj Vachovič.

Pavodle jaho słoŭ, ciapier ludzi pracujuć, pra niadaŭnija prablemy i praviedzienuju 8 červienia zabastoŭku nie ŭspaminajuć.

«Ciapier jość nadzieja na toje, što kali zatrymki zarpłaty i buduć zdaracca, to kiraŭnictva svoječasova budzie pra ich paviedamlać. Sumniavajusia, što ŭ budučyni zabastoŭki mohuć paŭtarycca. Tady, 8 červienia, u ludziej prosta nakipieła. Bo paŭhoda nichto z kiraŭnikoŭ z nami razmaŭlać nie chacieŭ. Daviałosia bastavać. Ciapier usio źmianiłasia. Z nami ličacca i viaduć dyjałoh», — skazaŭ Vachovič.

Za maj Vachovič atrymaŭ 4 miljony rubloŭ. Pavodle jaho słoŭ, heta siaredniaja zarpłata na zavodzie, jakuju rabotniki atrymali za apošni viasnovy miesiac.

Kupryjanaŭ nazyvaje minułuju zabastoŭku «rabočaj sustrečaj» i havoryć, što ciapier zavod zabiaśpiečany zamovami, ale nie ŭdakładniaje, jakimi mienavita, spasyłajučysia na kamiercyjnuju tajnu.

«Ciažkaści ŭźnikajuć na lubym pradpryjemstvie, tym bolš u hety niaprosty čas. Ja chadžu pa zavodzie, razmaŭlaju z kalektyvam i baču, što nastroj u rabočych ciapier narmalny, — skazaŭ kiraŭnik. — Chaciełasia b, viadoma, kab nahruzka ŭ nas była bolš rytmičnaja, ale, upeŭnieny, z časam usio naładzicca kančatkova. Nie budu pakul raskryvać, ź jakimi zamovami my ciapier pracujem. Biźnies lubić cišyniu».

Pavodle słoŭ Kupryjanava, siaredniaja zarabotnaja płata na zavodzie za apošnija piać miesiacaŭ skłała 3 miljony 600 tysiač rubloŭ.

Dźmitryj Kupryjanaŭ, źjaŭlajučysia namieśnikam hienieralnaha dyrektara pa kamiercyi i ekanamičnych pytańniach, praciahvaje vykonvać abaviazki hienieralnaha dyrektara. Hiendyrektar Michaił Anhierčyk znachodzicca na balničnym. Kupryjanaŭ śćviardžaje, što nie viedaje, kali budzie pryznačany novy hienieralny dyrektar i chto mienavita ŭznačalić pradpryjemstva.

• 0
• 0
• 0
• 0
• 0
• 0
• 0
• 0