Na hety čas bajcy śpiecroty «Tarnada» niasuć słužbu pavodle statutu i padparadkoŭvajucca vajennaj dyscyplinie.
Pra heta napisaŭ ministr unutranych spraŭ Ukrainy Arsien Avakaŭ ŭ Fejsbuku.
Jon paviedamiŭ, što ŭ rasparadžeńnie padraździaleńnia była nakiravana śpiecyjalnaja hrupa na čale z dvuma namieśnikami ministra, jakaja ŭčora nočču prybyła na miesca i pracavała ŭ raźmiaščeńni padraździaleńnia.
«Prablemy nieparazumieńnia i kanfliktu pamiž bajcami padraździaleńnia i vajennaj prakuraturaj — vyčarpanyja. I, kali ščyra, byli — miakka kažučy — stvoranyja štučna nieprafiesijnymi i niekarektnymi dziejańniami sumiežnikaŭ», — piša ministr.
Avakaŭ adznačaje, što siońnia idzie «ačyščeńnie» milicyi, śpiecpadraździaleńniaŭ.
«I vyhnańnie i aryšty «brudnych» milicyjantaŭ nie pavinny kidać cień na tych, chto sumlenna słužyŭ i słužyć Ukrainie! Heta pryncypova! Heta datyčycca i roty MUS «Tarnada» — hodnyja bajcy, jakija sumlenna vykonvali svoj abaviazak, tyja, chto hieraična prajaviŭ siabie ŭ Iłavajsku, Stanicy Łuhanskaj — buduć nieści słužbu dalej — prajšoŭšy pieraatestacyju, zaličanyja ŭ inšaje padraździaleńnie», - napisaŭ jon.
Što tyčycca kamandzira roty Rusłana Aniščanki i jašče šaści aryštavanych milicyjantaŭ pa abvinavačvańni ŭ šerahu ciažkich złačynstvaŭ, piša dalej Avakaŭ, to mieru ich adkaznaści vyznačyć pa vynikach śledstva sud.
«Jašče ŭčora v.a. kamandzira «Tarnada» Mikałaj Cukur vyrazna i jasna zajaviŭ, što padraździaleńnie vykonvaje ŭsie zahady ministra MUS i znachodzicca ŭ poŭnym kiravańni i ŭ składzie sił ATA. Inśpiekcyjnaja hrupa na čale z dvuma namieśnikami ministrami — hienierałami Jaravym i Rudenkam, jakaja prybyła siońnia na miesca, heta całkam paćvierdziła», — paviedamiŭ ministr.
Avakaŭ taksama piša, što asabista razmaŭlaŭ siońnia z v.a. kamandzira.
«Jon mnie dałažyŭ ŭsie abstaviny zdareńnia kanfliktu i padkreśliŭ poŭnaje viertykalnaje padparadkavańnie. Viadoma, bajcy ŭschvalavanyja aryštami kamandzira i šerahu tavaryšaŭ pa słužbie — ale całkam vykonvajuć usie kamandy i padparadkoŭvajucca vajennaj dyscyplinie. Bajcy śpiecpadraździaleńnia niasuć słužbu pavodle statutu. U častcy — dyscyplina i paradak», — paviedamlaje jon.
Kiraŭnik MUS dadaŭ, što ŭ raźmiaščeńni padraździaleńnia ciapier pracuje ministerskaja kamisija, jakoj sumiesna z aficerami roty pastaŭlena zadača: «jak maha chutčej pryniać usie nieabchodnyja rašeńni i vysnovy — vykanać zahad ministra i dać mahčymaść sumlennym bajcam vykonvać hałoŭnuju zadaču vajara siońnia — bierahčy Ukrainu ad voraha».
18 červienia pres-słužba MUS paviedamiła, što supracoŭniki Departamienta ŭnutranaj biaśpieki MUS i Hałoŭnaj vajennaj prakuratury HPU zatrymali kamandzira i siemiarych bajcoŭ roty patrulnaj słužby milicyi asablivaha pryznačeńnia «Tarnada».
Paśla hetaha Avakaŭ paviedamiŭ, što sud vybraŭ mieru strymańnia ŭ vyhladzie aryštu dla zatrymanych pradstaŭnikoŭ śpiecroty «Tarnada». Im pradjaŭlenyja abvinavačvańni, u tym liku ŭ niezakonnym pazbaŭleńni voli i vykradańni miascovych žycharoŭ, zabojstvie i šerahu inšych ciažkich złačynstvaŭ.
Pa słovach Avakava, sud vybraŭ mieru strymańnia ŭ vyhladzie aryštu biez ŭniasieńnia zakładu, viaducca śledčyja dziejańni.
Ciapier čytajuć
Tamara Vińnikava pradała svoj łondanski dom, zaviešany karcinami samoj siabie ŠMAT FOTA23
Kamientary