Padatkovaja: My nie možam biez sankcyi pryjści paličyć butelki ŭ vašym bary

Našumiełaja historyja z homielskim doktaram, u jakoha padatkovaja inśpiekcyja kanfiskavała «lišni» ałkahol, pakinuła bolš pytańniaŭ, čym adkazaŭ. Da prykładu, jakim čynam infarmacyja pra ałkaholnyja zapasy stała viadomaja padatkavikam i na jakich padstavach jany atrymali dostup da bara.

Dniami padatkovaja inśpiekcyja Savieckaha rajona Homiela raskazała pra miascovaha žychara, u jakoha doma zachoŭvałasia kala 200 butelek roznych ałkaholnych napojaŭ. A pavodle Administracyjnaha kodeksa zachoŭvać možna tolki 15 litraŭ ałkaholu, nabytaha ŭ Biełarusi — z ajčynnymi akcyzami, i 5 litraŭ nabytaha za miažoj. U vyniku padatkaviki kanfiskavali ŭ zapaślivaha doktara 178 butelek kańjaku, viski, harełki, vina dy inšych napojaŭ. I aštrafavali na 2 miljony rubloŭ.

Heta kab vy viedali, što možna zachoŭvać doma. Bo, jak kažuć, niaviedańnie zakona nie vyzvalaje ad adkaznaści. Ale jak sprava dajšła da adkaznaści, jak i ź jakoj nahody padatkaviki dabralisia da bara?

Razam sa śledčymi Śledčaha kamiteta, kaža načalnik padatkovaj inśpiekcyi pa Savieckim rajonie Homiela Kanstancin Traceŭski.

Kanstancin Traceŭski: «Padatkovyja orhany nie mohuć zajści ŭ žytło biez sankcyi, vy ž razumiejecie. I tut usio adbyvałasia ŭ miežach kryminalnaj spravy».

Takim čynam, usio prosta: Śledčy kamitet u miežach kryminalnaj spravy pravodziŭ u domie doktara pieratrus, śledčyja zazirnuli ŭ bar i… zaprasili dałučycca padatkavikoŭ. Hetuju infarmacyju Jeŭraradyjo paćviardžajuć i ŭ pres-słužbie Śledčaha kamiteta.

«U vytvorčaści Upraŭleńnia Śledčaha kamiteta pa Homielskaj vobłaści znachodziłasia kryminalnaja sprava ŭ dačynieńni da mužčyny 1954 hoda naradžeńnia pa artykule 433 «Atrymańnie niezakonnaha ŭznaharodžańnia».

Što da hetaj kryminalnaj spravy, to, kažuć u Śledčym kamitecie, jana była «całkam rasśledavanaja, vina hetaha čałavieka ŭstanoŭlenaja, jon jaje pryznaŭ, i kryminalnaja sprava z pryčyny stałaha ŭzrostu čałavieka i jaho raskajańnia była spynienaja na niereabilitujučych padstavach».

Adkazvajučy na našy pytańni, pradstaŭnik Śledčaha kamiteta ščyra ździŭlaŭsia: rasśledavańnie było zavieršanaje, a sprava spynienaja jašče ŭ lutym — čaho padatkaviki ŭspomnili jaje tolki ciapier?

Kanstancin Traceŭski: «Śpiecyfika našaj vobłaści — my pamiežža z Ukrainaj i Rasijaj. I my na hetym prykładzie prosta tłumačyli zakanadaŭstva: što jość 5 litraŭ, jość 30 butelek i hetak dalej. Bo ludzi z hetym sutykajucca, ale pra heta nie dumajuć».

A jaki dalejšy los kanfiskavanych 178 butelek ałkaholu?

Kanstancin Traceŭski: «Uvieś ałkahol idzie na źniščeńnie. Bo nieviadoma ž, z čaho jon tam».

Nazyvać proźvišča doktara ŭ Śledčym kamitecie admaŭlajucca, choć sprava pa atrymańni im «niezakonnaha ŭznaharodžańnia» i była zavieršanaja. Tamu adno pytańnie hetaj historyi zastajecca biez adkazu: pa jakim pryncypie mužčyna vybiraŭ, jakija z tych amal 200 butelek jon pakinie sabie?

• 0
• 0
• 0
• 0
• 0
• 0
• 0
• 0