«Jak ja ŭžo skazaŭ, kiraŭnictva Nacyjanalnaha banka, urad, dy i ja nie zacikaŭleny ŭ tym, kab biehčy ŭśled za Rasijaj i Ukrainaj. My nie chočam kapijavać toje, što adbyvajecca ŭ našych susiedziaŭ, u našych bratoŭ, — adznačyŭ siońnia Łukašenka. — My z usich sił, nie majučy takich vielizarnych reziervaŭ, dapuścim, jak Rasijskaja Fiederacyja, ścisnuŭšy zuby, trymajemsia».
«I ja nie darma skazaŭ, što ŭ hetym vypadku, situacyja vielmi surjoznaja, usio zaležyć ad našych ludziej: budzie devalvacyja, nie budzie, abryniem, nia abryniem, abvalim, nie abvalim. Heta našy ludzi, ja ŭ svoj čas pra heta ŭžo kazaŭ: nie biehajcie jak ahałošanyja z hetym rublom pa abmieńnikach i nie abmieńvajcie na valutu, nie handlujcie, bo heta budzie mieć nastupstvy», — skazaŭ Łukašenka.
«Viadoma, ludzi nie durni, jany razumiejuć, što Rasija abvaliłasia, va Ukrainie vy bačycie, jakaja situacyja. A heta našy asnoŭnyja rynki, kudy my pradavali svaju pradukcyju i adkul atrymlivali valutu. Naturalna, pry takich abvałach my nie majem tych abjomaŭ valuty, jakija byli ŭčora. i jany pačynajuć niejak strachavacca. Ludzi ž nie razumiejuć, a moža, nie žadajuć razumieć, što ŭ hetaha pracesu jość zvarotny kaniec, jaki udaryć ich i nas pa hałavie — heta pavieličeńnie popytu na valutu. a raz popyt pavialičyŭsia, značyć, raście cana valuty», — adznačyŭ kiraŭnik dziaržavy.
«Mohuć mnie skazać: słuchajcie, a navošta nam hety popyt i prapanova, davajcie niejak valutu rehulavać administracyjna. Možna administracyjna. Ale ŭsio ž ludzi chočuć, kab była svaboda: ci jość u mianie lišnija rubli — ja pajšoŭ i kupiŭ valutu, ci mnie patrebna valuta — ja jaje kupiŭ, jość u mianie valuta - pajdu pradam i kuplu rubli», — praciahnuŭ biełaruski lider.
Pavodle jaho słoŭ, pry volnym rynkavym pracesie abmienu valuty i ŭ inšych siektarach taksama pavinna być svaboda. «My nie možam rehulavać tut, a tam adpuskać, davać poŭnuju svabodu. My nie možam tut kuplu-prodaž zrabić svabodnymi, a dzie-niebudź niešta strymlivać. Kali volnaja - značyć volnaja», - skazaŭ jon.
«Ale byvajuć piki. Voś Nacyjanalny bank pavinien za košt handlu reziervami hetyja piki zhładžvać. Što my i robim da hetaha času. Ale kali ludzi vyrašyli pieravieści častku svaich srodkaŭ u valutu i pavialičvajuć popyt na jaje, valuta budzie daražeć. Što ŭ nas tak płaŭna i adbyvałasia, biez usialakich abvałaŭ», — adznačyŭ kiraŭnik dziaržavy.
«Dla nas ciapier hałoŭnaje — nie dapuścić abvałaŭ, nie kinucca ŭ vir za Rasijaj, bo my nie viedajem, jaki tam budzie rubiel i h.d. My viedajem adno - što my niasiem vialikija straty ŭ suviazi z abvałam rasijskaha rubla, tamu što heta naš asnoŭny rynak», — adznačyŭ Alaksandr Łukašenka. Jon dadaŭ, što na Rasiju prypadaje 42% biełaruskaha ekspartu i kala 15-20% — va Ukrainu.
«Heta značyć, situacyja niaprostaja. I, skazaŭšy ludziam pra toje, što my nie chočam, kab u nas abvaliłasia rezka nacyjanalnaja valuta, nam chaciełasia b prajści hety pieryjad voś takim čynam spakojna. Pakul u nas sił dla hetaha chapaje», - padkreśliŭ Łukašenka.
Kamientary