Łukašenka — Minachovy zdaroŭja: Nie bojciesia pryznać pamyłku nakont receptaŭ

Ministerstva achovy zdaroŭja nie pavinna bajacca pryznać, kali z pryniaćciem rašeńnia ab novym paradku vodpusku lekavych srodkaŭ u aptekach była zroblenaja pamyłka, zajaviŭ Alaksandr Łukašenka, prymajučy 9 śniežnia z dakładam ministra achovy zdaroŭja Vasila Žarko.

«I kali vy ažyćciaŭlajecie niejkija dziejańni, vy ž spačatku ludziam raskažycie. I adnačasova! A nie potym, kali ŭsie ludzi ŭ čerhi stali i šturmujuć apteki i palikliniki», — pryvodzić słovy Łukašenki pres-słužba prezidenta.

«Hetaja vaša viadomaja pastanova, jakaja, jak mnie zdałosia, vyklikała buru emocyj u našym hramadstvie. Ludzi pačali skardzicca, što ministerstva zajmajecca nie tym, čym treba, Ministerstvu achovy zdaroŭja treba zaniacca ŭmovami lačeńnia i hetak dalej i hetamu padobnaje, a nie ŭstanaŭleńniem niejkich biurakratyčnych pieraškod», — skazaŭ biełaruski kiraŭnik.

Alaksandr Łukašenka adznačyŭ, što paprasiŭ jak asobnych daktaroŭ raskazać pra situacyju, tak i daručyŭ Infarmacyjna-analityčnamu centru pry Administracyi prezidenta pravieści daśledavańnie ŭ hramadstvie.

«Ludzi nastrojenyja vielmi niehatyŭna! I nielha supraćpastavić ich mierkavańniu ničoha! — padkreśliŭ jon. — Dapuścim, navošta heta było ŭvodzić napiaredadni roznaha kštałtu virusaŭ, epidemij, vostraha pieryjadu zachvorvańnia? Nahruzka na daktaroŭ pavialičyłasia pry vypiscy. I šmat inšych pytańniaŭ i prablem».

«Vy mnie havorycie ab tym, što chtości tam łabiruje hetyja pracesy, kamuści nie padabajecca, u srodkach masavaj infarmacyi ŭzdymajuć pytańni, a na samaj spravie pryniata pravilnaje rašeńnie. Ja nie vyklučaju, što kamuści heta nie padabajecca. I heta ŭ nas zaŭsiody byvaje», — zajaviŭ Łukašenka.

Na jaho dumku, biźniesmieny, ułaśniki aptek i hetak dalej «ukidvajuć u srodki masavaj infarmacyi svaje niezadavalnieńni». «Tak, na heta treba reahavać, treba, kab valuta ŭ krainie zastavałasia i inšaje. Ale treba rabić heta razumna, kab nie stvarać prablem ludziam», — adznačyŭ aficyjny lidar.

Vasil Žarko u svaju čarhu źviarnuŭ uvahu na toje, što pryniataja ŭ vieraśni hetaha hoda pastanova, jakaja praduhledžvaje ŭzmacnieńnie kantrolu za recepturnym vodpuskam lekavych srodkaŭ, źjaŭlajecca pa sutnaści praciaham pastanovy, pryniataj u 2012 hodzie, pa pieraliku recepturnaha i biezrecepturnaha vodpusku lekavych srodkaŭ. Pavodle jaho słoŭ, hety pieralik nie pašyrany ni na adzin lekavy srodak. Sioleta była ŭviedziena tolki adna norma: zachoŭvańnia recepta ŭ aptecy na praciahu miesiaca. Ministerstva achovy zdaroŭja adznačaje značny rost abjomu spažyvańnia lekavych srodkaŭ. U vyniku analizu situacyi ministerstva pryjšło da zaklučeńnia, što častka lekavych srodkaŭ recepturnaha śpisu adpuskajecca biez recepta. Pavodle słoŭ Žarko, čaściej za ŭsio heta adbyvajecca ŭ kamiercyjnych strukturach.

Łukašenka pacikaviŭsia ŭ ministra, kolki pryvatnych aptek było zakryta ŭ suviazi z hetym parušeńniem. Pavodle słoŭ Žarko, sioleta prypyniena praca 10 aptek, jašče dźvie apteki zakrytyja. 

«Siarod tysiač aptek vy dźvie zakryli. A vy pavinny byli ich papiaredzić: adno parušeńnie (heta ž biaśpieka, zdaroŭje ludziej) — apteku zakryli, druhuju zakryli, treciuju, piatuju, dziasiatuju i ŭsio b narmalizavałasia», — ličyć biełaruski kiraŭnik.

Ministr adznačyŭ, što składana dakazać parušeńnie vodpusku lekaŭ u aptecy, kali recept u joj nie zastajecca. «Ja štokvartalna źbiraju ŭ ministerstvie tych, chto zajmajecca i optam, i roźnicaj, i papiaredžvaju: niama abhruntavańnia pavieličeńnia vodpusku lekavych srodkaŭ», — skazaŭ Žarko.

Łukašenka zapatrabavaŭ «žalezna navieści paradak».

• 0
• 0
• 0
• 0
• 0
• 0
• 0
• 0