U staličnaj halerei «Ŭ» 30 žniŭnia prachodzić III Ahrakulturny fiestyval, na jakim biełaruskija fiermiery pradstaŭlajuć svaje ekałahičnyja haspadarki, vyrablajemuju imi arhaničnuju pradukcyju, a śpiecyjalisty pravodziać majstar-kłasy pa jakaści vady i arhanizacyi čystaj dziejnaści na ziamielnych učastkach.
Arhanizatarami mierapryjemstva vystupili halereja sučasnaha mastactva «Ŭ», hramadskaje abjadnańnie «Ekadom» i ekałahičnaja ŭstanova «Ahra-Eka-Kultura». Fiestyval arhanizavany pry sadziejničańni Centra ekałahičnych rašeńniaŭ i «Zialonaj sietki».
Pavole słoŭ arhanizataraŭ, ahrakulturny fiestyval za apošnija hady staŭ sapraŭdnym śviatam arhaničnaha ŭradžaju dla tych, chto zacikaŭleny ŭ jakaści spažyvajemaj pradukcyi. Sioleta prahrama fiestyvalu nadzvyčaj raznastajnaja — heta znajomstva ź biełaruskimi fiermierami i prezientacyi ich ekałahičnych haspadarak, dehustacyja ich arhaničnaj pradukcyi, majstar-kłasy pa viadzieńni čystaj haspadarki, dyskusii, vystava i kancert hurtu Port Mone.
Jak paviedamiła pradstaŭnik «Ekadoma» Iryna Suchij na pres-kanfierencyi pierad adkryćciom fiestyvalu, apošnim časam adznačajecca pavyšanaja cikavaść da arhaničnaha ziemlarobstva.
«Kali my pačynali, my źviatalisia ź pieršym listom u Minsielhascharč z pytańniem, ci zacikaŭlena dziaržava ŭ arhaničnaj sielskaj haspadarcy, čym my možam dapamahčy, — skazała jana. — My atrymali adkaz, što dziaržava ŭ hetym nie zacikaŭlena, heta nie pryjarytet dla Biełarusi. Praź niekatory čas situacyja źmianiłasia. Niadaŭna była pryniata i zaćvierdžana Saŭminam prahrama pa raźvićci arhaničnaj sielskaj haspadarki. Rychtujecca adpaviednaje zakanadaŭstva».
Pradstaŭnik ekałahičnaj ustanovy «Ahra-Eka-Kultura», kandydat sielskahaspadarčych navuk Łana Siemienas raskazała ab važnaści arhaničnaj sielskaj haspadarki. Śpiecyjalist adznačyła, što arhaničnaje ziemlarobstva šmat u čym adroźnivajecca ad taho, jakoje siońnia paŭsiudna praktykujecca ŭ Biełarusi, tym, što «jano imkniecca pracavać u harmonii z pryrodaj», kab «atrymlivać čystuju prdukcyju». Takaja pradukcyja «nie ŭtrymlivaje piestycydaŭ, inšych škodnych rečyvaŭ», heta «bolš smačnyja i karysnyja dla zdaroŭja pradukty». U toj ža čas arhaničnaja sielskaja haspadarka, pavodle jaje słoŭ, važnaja nie tolki dla čałavieka, ale i dla pryrody, jakaja nie pakutuje ad vykarystańnia chimikataŭ.
«My bačym, što z kožnym hodam cikavaść da arhaničnaj sielskaj haspadarki tolki raście», — padkreśliła Siemienas.
Ciapier čytajuć
«Kibierpartyzanaŭ» krytykujuć za ŭzłom sajta Nacbiblijateki — bo ciapier nie pracuje katałoh. Tyja adkazali8
Kamientary