Hrupu biełaruskaj demakratyčnaj intelihiencyi ŭznaharodzili medalami imia Jana Masaryka Ministerstva zamiežnych spravaŭ Čechii i hanarovymi dyplomami. Uznaharody ŭručyŭ kiraŭnik českaj dyplamatyčnaj misii ŭ Miensku Ŭładzimier Rumł.
Hrupu biełaruskaj demakratyčnaj intelihiencyi ŭznaharodzili medalami imia Jana Masaryka Ministerstva zamiežnych spravaŭ Čechii i hanarovymi dyplomami. Uznaharody ŭručyŭ kiraŭnik českaj dyplamatyčnaj misii ŭ Miensku Ŭładzimier Rumł.
U 2005 hodzie ŭ Biełarusi adznačalisia 155‑ia ŭhodki z dnia naradžeńnia pieršaha prezydenta Čechasłavaččyny Tomaša Masaryka. Siabry hramadzkaha‑histaryčnaha klubu «Spadčyna» zładzili tady ŭ staličnym Domie litaratara viečarynu, pryśviečanuju Masaryku. Siabry klubu vyvučali historyju česka‑biełaruskich kulturnych stasunkaŭ i, tak by mović, adlustroŭvali jaje ŭ svaich žanrach: daśledavali archiŭnyja materyjały, pisali artykuły, malavali.
«My rabili niekalki viečarynaŭ, sumiesnych pasiedžańniaŭ, pryśviečanych Masaryku, — raskazvaje staršynia klubu «Spadčyna» Anatol Bieły. — Malavali partrety. Da prykładu, Aleś Cyrkunoŭ namalavaŭ partret, pryśviečany praskim studentam‑biełarusam, Anatol Kryvienka namalavaŭ partrety českich prezydentaŭ Tomaša Masaryka i Vacłava Haŭła. Žurnalist Anatol Mialhuj pisaŭ pra českuju muzyku».
I voś sioleta Ministerstva zamiežnych spravaŭ Českaj Respubliki adznačyła siemiarych biełarusaŭ.
«Byli ŭznaharodžanyja siabry abjadnańnia «Spadčyna», — havoryć ataše pa kultury pasolstva Čechii ŭ Biełarusi Tomaš Jadłoŭski. — Jany byli adznačanyja za pahłybleńnie česka‑biełaruskich dačynieńniaŭ u halinie kultury. Ja tut pracuju z 2005 hodu, za čas majho znachodžańnia tut heta ŭpieršyniu».
Bronzavyja medali imia Jana Masaryka (ministra zamiežnych spravaŭ paślavajennaj Čechasłavaččyny, syna pieršaha prezydenta Tomaša Masaryka) atrymali krajaznaŭca, stvaralnik muzeju ŭ Starych Darohach Anatol Bieły, mastaki Aleś Cyrkunoŭ, Anatol Kryvienka, Michaś Karpuk, Nadzieja Sarmant, archivist Anatol Vałachanovič, žurnalist Anatol Mialhuj.
Mastak Aleś Cyrkunoŭ raskazvaje pra svaju pracu, za jakuju atrymaŭ ŭznaharodu MZS Čechii:
«Ja, u pryvatnaści, napisaŭ karcinu «Śviatazarny mur», pryśviečanuju biełaruskim studentam, jakija na zaprašeńnie Tomaša Masaryka vučylisia ŭ Karłavym universytecie (heta chvala času Zabejdy‑Sumickaha, Łarysy Hienijuš dy inšych, tam było z paŭtysiačy čałaviek). Ja źmiaściŭ najbolš vybitnych ludziej».
Kamientary