U Krymie «nieviadomyja» zachapili vajenkamat, stralali pa aŭtamašynie, pabili žurnalistaŭ
Siońnia, u pieršaj pałovie dnia, hrupa ludziej u vajennaj formie biez apaznavalnych znakaŭ zachapiła budynak respublikanskaha vajennaha kamisaryjata ŭ Simfieropali (vulica Kijeŭskaja).
Pavodle infarmacyi krymskaha miedyjacentra Minabarony Ukrainy, na terytoryju vajennaha kamisaryjata zajšli kala sotni aŭtamatčykaŭ z «samaabarony Kryma». Uzbrojenych ludziej rasstavili na pavierchach. Ŭsich aficeraŭ vyvieli za miežy častki.
Na terytoryju zajechali niekalki hruzavikoŭ z ŭzbrojenymi ludźmi.
Apoŭdni tam ža, kala respublikanskaha vajenkamata, nieviadomyja abstralali aŭtamabil kijeŭskich aktyvistaŭ.
«My sabralisia jechać, sieli ŭ mašynu, ja zdymaŭ na telefon, paśla čaho jany pačali biehčy da nas i stralać, my zmahli adjechać mietraŭ 700 da handlovaha centra i vyklikali milicyju i telebačańnie», — raspavioŭ Alaksiej Tarmazaŭ z Kijeva.
Na videa vidać i čuvać, jak pasažyry ŭ mašynie biahuć ź miesca zdareńnia, prosiać, kab kiroŭca jechaŭ chutčej. U hety ž čas čuvać streły.
«Pa nas i ŭ mašynu vypuścili bolš za 10 kul, prabityja koły, vidać ślady ad ahniastrelnaj zbroi na korpusie mašyny», — paviedamiŭ Alaksiej Tarmazaŭ.
Kala 17:00 (18:00 pa Minsku) padziei atrymali praciah. «Zialonyja čałaviečki» la respublikanskaha vajenkamata źbili žurnalistaŭ, adabrali fłeš-karty i paškodzili techniku.
Pra heta na svajoj staroncy ŭ Facebook paviedamiła žurnalistka Hromadske TV Hanna Babiniec.
Pavodle jaje słoŭ, jana i žurnalist Dmytro Hnap «šukali tut hilzy paśla ranišniaj pierastrełki i ledź nie patrapili ŭ dzionnuju».
«Nas było kala dziesiaci, usie žyvyja-zdarovyja, paškodzili techniku i adabrali fłeški», — adznačyła Babiniec.
Razam z tym žurnalisty paviedamlajuć, što rasijskija vajennyja ŭžo nie chavajucca: tak, na fota — rasijskaja vajennaja mašyna, jakaja vyjazdžaje z terytoryi zachoplenaha vajenkamata.
Ciapier čytajuć
Daradca prezidenta Polščy prakamientavaŭ zvarot Kaleśnikavaj i Zołatavaj: Łukašenka vypuskaje niekalki dziasiatkaŭ viaźniaŭ, a na nastupny dzień zatrymlivaje novych1818
Kamientary