Hienadź Davydźka: ANT – rasijski kanał, zatoje BT – čysta biełaruski

Staršynia Biełteleradyjokampanii Hienadź Davydźka pravioŭ anłajn-kanfierencyju. Prapanujem samyja aryhinalnyja adkazy «ministra telebačańnia» na pytańni hledačoŭ.

– Čamu ŭ efiry šmat «pustoj» sacyjalnaj rekłamy, a taksama biezabličnaj rekłamy usialakich maziaŭ, sprejaŭ, masažoraŭ? … Kali idzie nieestetyčny rolik, chočacca syści na inšuju knopku.

– Ja dumaŭ, što ludzi rekłamu nie hladziać. U hety «załaty čas» jość mahčymaść namazać buterbrod, zvaryć sabie kubačak kavy i viarnucca da lubimaj pieradačy. Kali vam nie padabajecca rekłama, sychodźcie na inšuju knopku.

– Vam nie kryŭdna, kali hladač, bačačy niajakasny pradukt na inšych kanałach (ANT, STB) abahulniena narakaje na BT, ci naadvarot hanaryciesia, što «Biełaruś 1» asacyjujuć z usim biełaruskim telebačańniem?

– Mianie nie cikavić mierkavańnie telehledača, jaki nie adroźnivaje rasijski kanał ANT abo kanał STB, jaki ŭ asnoŭnym stvarajecca na bazie «RIEN TB», ad čysta biełaruskich kanałaŭ. Chaj jon tak dumaje.

– Čamu nie zaprašajecie ŭ «Kłub redaktaraŭ» kiraŭnikoŭ niedziaržaŭnych abo apazicyjnych vydańniaŭ? Pakličcie kaho-niebudź z procilehłym mierkavańniem, bo adrazu rejtynh padymiecca ŭ razy, pieradača stanie našmat bolš cikavaj i dynamičnaj.

– Pa-pieršaje, pytańnie niapravilnaje. U nas u krainie, pa-mojmu, u try razy niedziaržaŭnych ŚMI bolš, čym dziaržaŭnych. Tamu pradstaŭniki niedziaržaŭnaj presy pastajanna prysutničajuć na kłubie. Ja nie zaprašaju pradstaŭnikoŭ antydziaržaŭnaj presy - ich 3-4 vydańni ŭ nas jość u krainie, ci tam 5, dapuścim. Ale heta ja rablu navat nie naŭmysna. Ja niejak zaprasiŭ, ale jany admovilisia ŭdzielničać, mabyć adčuvajučy svaju słabaść u šerahu pytańniaŭ. I ŭłasna kažučy, navošta mnie zaprašać zahadzia anhažavanych viadomych ludziej, kab rabić z hetaha šou? U dadzienym vypadku ŭ hetym farmacie ja nie za rejtynh zmahajusia, a za praŭdu. Iścina nie ŭ kryku naradžajecca. Debaty na minułych parłamienckich vybarach, u jakich u žyvym efiry vychodzili pradstaŭniki roznych apazicyjnych partyj, pakazali, nakolki jany nie hatovyja da adkrytaj razmovy, da dyjałohu, da sprečki. Jany adrazu apuskajucca da abrazy i adnu i tuju ž cytatu ad siabie abo ad niejkaha svajho pravadyra, jaki stajaŭ za ich śpinoj, šmatkroć paŭtarajuć, i heta prosta niecikava i kryŭdna za apazicyju.

P.S. Adznačym, što redaktar «Naša Niva» ni razu ŭ «Kłub redaktaraŭ» paklikany nie byŭ. Ale z zadavalnieńniem by vykazaŭ svaju pazicyju ŭ efiry.

• 0
• 0
• 0
• 0
• 0
• 0
• 0
• 0