Rahačoŭski hurt SEX imkliva nabraŭ papularnaść siarod biełaruskich amataraŭ panka pryblizna paŭtara hoda tamu. Nie kožny muzyka moža prajechacca z paśpiachovym turam pa kłubach Biełarusi i być zapatrabavanym u Rasii. Adnak ad niadaŭniaha času muzyki stali sutykacca ź niepryjemnaściami.
«Pačałosia ŭsio ŭ lutym hetaha hoda, — raskazvaje lidar hurta Valeryj Navičkoŭ — My akurat źniali treci klip, kali mianie vyklikaŭ načalnik na pracy, jakomu źvierchu dali zadańnie razabracca, čym zajmajucca jahonyja supracoŭniki.
Akazałasia, što ŭ našym klipie šukali zakliki da ŭžyvańnia narkotykaŭ (muzyki dali dla hetaha padstavu — u klipie jany irvuć i pichajuć u pakiety kanopli). Što praŭda, nie znajšli, adnak mnie daviałosia zvolnicca pa «asabistym žadańni».
Tady ž hurt sutyknuŭsia z abvinavačvańniem u fašyźmie — niechta pačuŭ u radku «svoj puť po žiźni ja vybiraju sam» «svoj puť fašizma». Ale na hetym niepryjemnaści nie skončylisia.
Sioleta ŭ Rahačovie musiŭ adbycca tradycyjny fest Rockachev, jaki musiŭ stać adnym z samych jaskravych rok-kancertaŭ Biełarusi: da ŭdziełu ŭ feście było zaprošana kala 40 hurtoŭ, siarod jakich rasijskija chedłajniery ŭzroŭniu Stigmata i «Valentin Strykało».
«Tady fest, jaki my arhanizoŭvali, u adździele kultury nazvali satanizmam i djabalščynaj, — raskazvaje Valeryj. — Da kožnaha sa svaich kancertaŭ my rychtujem videa-zaprašeńnie, jakoje raźmiaščajem ŭ našych supołkach u sacyjalnych sietkach. I voś niejki ananim razasłaŭ adzin z takich rolikaŭ pa roznych instancyjach, pryviazaŭšy jaho da festu.
Nam inkryminavali parnahrafiju — tak, u zaprašeńni možna ŭbačyć aholeny azadak, adnak my ŭsio ž panki, pa druhoje tam vidavočny ściob».
Vakalista i hitarysta hurtu vyklikali ŭ milicyju, adnak składu złačynstva («vytvorčaść parnahrafii») ŭ vyniku nie znajšli.
Ciapier ža, paśla paśpiachovaha tura pa Biełarusi, muzykaŭ SEX vyklikali ŭ sud, raspačaŭšy suprać jaho administratyŭnuju spravu. Słuchańni majuć adbycca zaŭtra — u toj samy dzień, kali hurt musiŭ vystupać u Maskvie.
«Čarhovaje tajamničaje supadzieńnie, nie pieršaje va ŭsioj hetaj historyi, — kaža Valeryj. — Čamuści ni ŭ adnym horadzie Biełarusi da nas niama nijakich pretenzij, aproč jak u rodnym Rahačovie.
Z čym heta źviazana? Mahčyma, asabistaja niepryjaznaść niejkaha nieviadomaha nam čałavieka. Ci maje da hetaha dačynieńnie naša nazva? Mnie padajecca, što nie — u rešcie rešt hetaje słova jość u lubym biełaruskim pašparcie».
Ciapier čytajuć
Pastar Hrem na «Čyžoŭka-arenie» paprasiŭ malicca za Łukašenku i Pucina. A sam maliŭsia za Trampa26
Pastar Hrem na «Čyžoŭka-arenie» paprasiŭ malicca za Łukašenku i Pucina. A sam maliŭsia za Trampa
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie5555
Kamientary