Apazycyja padvysiła pensii. Čas adkručvać ceny?:)
Pakolki słanoŭ dla razdačy ŭ apanentaŭ režymu niama, ichni pijar moža być tolki asymetryčnym. Ale ž kalkulatarnych pieramoh nad aŭtarytarnymi režymami nie byvaje. Piša ŭ svaim błohu Alaksandar Kłaskoŭski.
Pryziemlenaja sacyjałka tradycyjna była kańkom ułady ź jejnym bydłavatym słohanam "nakarmić narod". Siońnia sacyjałka stanovicca karonkaj apazycyi.
Jaje lidery abiacali napoŭnić Sacyjalny marš kreatyvam. I sapraŭdy, treba addać naležnaje pravakacyjna-humarystyčnamu pijaru:) Sa słoŭ Anatola Labiedźki, ułada ź pierapudu ŭžo padvysiła pensii. A što, kali na toje, dyk całkam piśmiennaja metoda: luby stanoŭčy krok kiroŭnych viarchoŭ zapisvać u svoj aktyŭ — aha, maŭlaŭ, spałochalisia, zakrucilisia jak vužy na patelni! Pakolki ŭłasnych słanoŭ dla razdačy ŭ apanentaŭ režymu niama, to ichni pijar moža być tolki takim voś — asymetryčnym.
Mienavita na sacyjałcy apazycyjnaje kiraŭnictva maryć pašyryć elektaralnuju bazu z tradycyjnych 20-25% da "bolej čym 50%".
Pakiniem u baku pytańnie pra realistyčnaść pakazčyku ŭ ahladnaj perspektyvie. Ale ž zahvazdka jašče i ŭ tym, što ŭ nas praviły hulni — hm-hm! — trochi inšyja, čym, naprykład, u matčy Sarkazi — Ruajal ci ŭ supiernictvie partyjaŭ słana dy asła ŭ Amerycy. Ciažka ŭjavić, što apazycyja ŭ nas moža pieramahčy, umoŭna kažučy, ź likam 51:49. Takich kalkulatarnych pieramoh nad aŭtarytarnymi režymami nie byvaje. Scenar ža bury dy nacisku, kali zychod palityčnaha dvuboju vyrašaje impet vulicy, pakul što nijak nie vymaloŭvajecca. Voś tut ja trochi parazvažaŭ na hety kont, adkazvajučy na pytańni "Radyjo Racyja".
Što ž da patencyjału "bury i nacisku", raju pračytać "Ałhiebru revalucyi" Jurja Drakachrusta. Humanitaraŭ zaklikaju nie pałochacca formułaŭ. Vyraznyja vysnovy vartyja taho, kab pradracca cieraz ałhiebraičny huščar:)
Nu a pakul što pavinšujem tytulnuju apazycyju ź pieršym pośpiecham na sacyjalnym poli. Pensii, dziakuj bohu, padvysili. Mo' na nastupnaj palitradzie varta "adkrucić ceny"? :))
Kamientary