Kiraŭnik dziaržkamisii pa identyfikacyi materyjałaŭ raskopak u Homielskim rajonie ličyć «zaŭčasnym i niekarektnym» uklučeńnie vučonych u skład kamisii.
Pra heta havorycca ŭ adkazie N.Aksionavaj, jakaja taksama źjaŭlajecca namieśnikam staršyni rajvykankama, na list sustaršyniaŭ hramadskaha arhkamiteta pa ŭviekaviečańni pamiaci achviar stalinizmu. U liście ŭtrymlivałasia prośba ŭklučyć u skład dziaržkamisii kandydata histaryčnych navuk Anatola Vałachanoviča ź Minska i kandydata histaryčnych navuk dacenta Homielskaha dziaržaŭnaha univiersiteta imia F.Skaryny Aleha Makušnikava.
Jak paviedamiŭ BiełaPAN sakratar arhkamiteta Uładzimir Ramanoŭski, u liście N.Aksionavaj, atrymanym 16 lipienia, paviedamlajecca, što ŭ Homielskim rajvykankamie «stvorana kamisija ŭ składzie ŭpaŭnavažanych słužbovych asob». «Pakolki da hetaha času rajonnaj kamisijaj nie atrymana ekśpiertnaje zaklučeńnie, rajvykankam ličyć zaŭčasnym i niekarektnym razhladać prapanovy, što pastupajuć ad jurydyčnych i fizičnych asob, bolš za toje — rabić papiarednija vysnovy nakont lubych z vystaŭlenych viersij pachavańnia astankaŭ biez najaŭnaści nieasprečnych dokazaŭ», — havorycca ŭ liście.
Adnak, jak zaznačyŭ U.Ramanoŭski, nijakimi zakanadaŭčymi aktami nie vyznačany dziejańni rajvykankama pry vyjaŭleńni pachavańniaŭ achviar stalinizmu. «U hetym vypadku ŭsiu paŭnatu maralnaj adkaznaści za admovu ad dyjałohu z hramadskaściu ŭskładaje na siabie Natalla Aksionava», — skazaŭ U.Ramanoŭski. Pavodle jaho słoŭ, dalejšyja kroki hramadskaści ŭ hetym kirunku buduć abmiarkoŭvacca na čarhovym pasiadžeńni arhkamiteta ŭ Minsku 23 lipienia.
Nahadajem, padčas raskopak z 6 maja pa 11 červienia ŭ Prybytkoŭskim sielsaviecie, u lesie na 9‑m kiłamietry šašy Homiel — Čarnihaŭ, va ŭročyščach Try Słupy i Borki 52‑i asobny pošukavy bataljon upraŭleńnia ŭviekaviečańnia pamiaci abaroncaj Ajčyny i achviar vojnaŭ Ministerstva abarony znajšoŭ astanki 70 čałaviek. Pavodle źviestak miascovych žycharoŭ, u hetym rajonie ŭ pieradvajennyja hady supracoŭniki NKUS pravodzili masavyja źniščeńni achviar stalinizmu, u tym liku žycharoŭ Ukrainy.
Kamientary