Zvažajučy na apošnija tendencyi ŭ sfery niedziaržaŭnych ŚMI, uzrastaje rola alternatyŭnaha raspaŭsiudu niecenzuravanaj infarmacyi. Adnoj z takich mahčymaściaŭ staŭ Internet. «NN» prapanuje ahlad šerahu sajtaŭ, što adnosna niadaŭna pačali svaju dziejnaść.
Viadomy maskoŭski žurnalist Pavał Šaramiet pajšoŭ u virtualnaje padpolle dy stvaryŭ razam ź inšymi žurnalistami rasiejskamoŭny sajt «Biełaruski partyzan» (www.belarusparti-zan.org). Pavodle słoŭ stvaralnikaŭ, heta narodny sajt, jaki robiać nie palityki, nie revalucyjanery i nie partyjnyja prapahandysty. Jahonaja meta — viedać praŭdu ab usim, što adbyvajecca ŭ Biełarusi, i abaranić svajo prava na raspaŭsiud abjektyŭnaj infarmacyi, a taksama prava ludziej na jaje atrymańnie. Dyzajn padkreślena partyzanski, nazva dy vyjava vusataha partyzana vytrymany ŭ stylistycy apošniaj vajny. Sajt źmiaščaje niekalki raździełaŭ: aperatyŭnaja infarmacyja pra padziei ŭ sfery hramadzka-palityčnaha žyćcia i ekanomiki, kalekcyja knih (pieravažna pra Łukašenku), našumiełyja multfilmy, a taksama raździeł pad nazvaj «Trybunał», na staronkach jakoha raźmieščany karotkija źviestki pra asobaŭ, adkaznych za pieraśled palityčnych aktyvistaŭ, — sudździaŭ, čynoŭnikaŭ. Śpis uvieś čas papaŭniajecca.
Dźviuchmoŭny (rasiejskaja i anhielskaja) sajt «Euramost.org» — infarmacyjna-analityčnaja internet-hazeta. Vyniatak — naviny «Svabody» taraškievicaj. Prapanuje šyroki spektar navin ad palityki da kultury, bahata źviestak z rehijonaŭ (pieravažna z Haradzienščyny).
Sajt «Bel-Svoboda.net» prapanuje čytačam «praŭdzivuju i nieanhažavanuju» infarmacyju pra Biełaruś i jaje susiedziaŭ. Hrupa stvaralnikaŭ vydańnia planuje znajomić čytačoŭ z materyjałami ajčynnych dy zamiežnych žurnalistaŭ, analityčnymi ahladami i kamentarami, a taksama zaprašaje da supracoŭnictva ŭsich achvotnych. Taksama na sajcie jość mahčymaść užo ciapier prahałasavać za svajho kandydata ŭ prezydenty. Na momant napisańnia materyjału ŭ virtualnych vybarach pieramahaje A.Milinkievič (38,6%). Druhoje i treciaje miescy zajmajuć A.Łukašenka (26,2%) i Z.Paźniak (18,7%).
Niahledziečy na pieraśled «LLL-multaŭ», sajtaŭ satyryčnaha źmiestu nie pamienieła. Ale časam satyra abražaje nia tolki peŭnych asobaŭ, ale i ŭsio hramadztva. Tak sajt «Extraland.net» Biełaruś nazyvaje Bulbarusijaj, a nasielnikaŭ — bulbarusami, što, zabyŭšysia na svaje karani, žyvuć u vioscy, u chatach z kraju, i adzinym zaniatkam majuć hadavańnie sała i vytvorčaść samahonu. Kiruje krainaj karol Łu. Adnak u pavietry nosicca pach palenaha hnoju — chutka vybary…
Jašče što kidajecca ŭ vočy — častaje ihnaravańnie niekatorymi partałami aficyjnaj nazvy dziaržavy. Dobra, kali vykarystoŭvajucca rasiejskija naviny, adnak kali navat pavažany Pavał Šaramiet sam nazyvaje krainu «Biełoruśsijej». Čym nie padstava žartaŭnikam z «Extraland.net» dla ździeklivych kiepikaŭ?
Prapanavany śpis sajtaŭ daloka nia poŭny. Kožny volny sam vybirać, ź jakich krynic atrymlivać infarmacyju i jakuju infarmacyju ličyć praŭdzivaj i biesstarońniaj.
Ciapier čytajuć
Chto toj nieadekvatny biełarus, jaki lasnuŭ dziciatka hałavoj ab padłohu ŭ maskoŭskim Šaramiećcievie6
Kamientary