Паштовая скрынка

Паштовая скрынка

Арцёму А. зь Віцебску. «Пяць ружаў» — пранізьлівая рэч, але мова яшчэ Вам не даецца.

Сяргею Б. з Гомеля. А дзе ж «die modernen Sagen»? Дзёньнік ня можа быць самамэтай. Толькі тое, што нельга не запісаць, вартае запісу.

Уладзіславу І. зь Віцебску. Мала пішам, бо Вы ня пішаце. Думкі з допісу паўтараюць ідэі Элізабэт Бадэнтэр, урывак з бэстсэлеру якой «ХY. Мужчынская сутнасьць» мы друкавалі ў 1997 годзе. Мачысцкі кодэкс паводзінаў і гамафобская ідэалёгія існуюць, і ўжо гэтым яны нам цікавыя, а грамадзтву карысныя. Цэнзураваць аўтараў мы ня будзем.

Тацяне К. Інтэрнэт стварае новую мысьленчую сытуацыю: праўду становіцца вельмі цяжка адрозьніць ад няпраўды. Бо немагчыма кантраляваць аўтарства, бо колькасьць інфармацыі перавышае крытычную і ніякая цэнзура ці квазыцэнзура немагчымыя. Таму калі ў Інтэрнэце пішуць, што «камуністы ядуць дзяцей», людзі ня вераць, бо яны бачылі шмат камуністаў. Калі ж пішуць «амэрыканцы скідаюць на Югаславію ўранавыя бомбы», дык сёй-той верыць, бо, як сьцьвярджаецца ў адным зь перакладаў «Прыгодаў Алісы ў краіне цудаў», «ён не знаёмы з павадкамі іхтыязаўраў».

Валер’ю С. зь Берасьця. Гэта цяпер у Беларусі і пад іншымі такімі рэжымамі людзі гінуць тысячамі — бо няма чым лячыць, а тысячы нараджаюцца з страшнымі хваробамі — бо няма рэактываў, каб гэта ў свой час перадгадаць, а мільёны сьпіваюцца — бо ня маюць надзеі на долю. А Вы наглядзеліся чужога тэлебачаньня, і паўтараеце за імі. Глядзіце ж таксама польскую ТВ, спадарожнікавыя эўрапейскія каналы, параўноўвайце тое, што бачыце. Войска, танкаў і самалётаў у пераліку на чалавека ў нас ужо цяпер найбольш у Эўропе, а толку найменш, а вы прапануеце яшчэ войска ўзмацняць. Калі Ваш настаўнік верыць у жыдамасонскасыянісцкія змовы, дык ён проста дурны.

Юр’ю К. з Трыесту. У электронным ліставаньні зручна карыстацца беларускай лацінкай або яе «безгачковымі» варыянтамі. Было б цікава, каб вы напісалі, што думаеце пра падзеі ў Югаславіі. Электронныя адрасы беларускіх выданьняў наступныя:

«Навіны» http://www.belarus.net/MassMedia/Newspaper/Svaboda/

«Arche» http://arche.home.by

«Беларускі гістарычны агляд» http://members.xoom.com/belhista або http://pagina.de/bha

«Архіў найноўшай гісторыі» http://members.xoom.com/_anh_

Побач можна знайсьці й іншыя выданьні.

Адасю Л. зь Менску. Герой апавяданьня, «дзейная асоба кірмашовага часу», не ўяўляе цікавасьці.

Юрасю Б. зь Менску. Ці можна два разы адным і тым самым пальцам пакалупацца ў адным і тым самым носе?

Віктару М. зь Менску. Паспрабуйце напісаць артыкул, ні разу ня ўжыўшы словаў «трэба» і «мусім».

Зьмітру С. зь Менску. «...сэнс нэўтралізацыі набыцьця легітымнасьці Лукашэнкам — майстрам плебісцытарнай мабілізацыі электаральных масаў» — гэта ж дысэртацыя.