Як правільна захоўваць агуркі, памідоры, бульбу і моркву? Раіць садоўнік

Садоўнік Дзмітрый Кастрыцкі расказаў на АНТ, у якіх умовах лепш захоўваць агуркі, памідоры, бульбу, буракі і гарбуз.

Так, для агуркоў падыходзіць нізкая тэмпература. Ідэальнай будзе тая, што падтрымліваецца на ніжняй паліцы халадзільніка — там пастаянная прахалода. Пакласці агуркі садоўнік раіць у тканінны або папяровы пакет, які дыхае (не паліэтыленавы, дзе скапленне кандэнсату прывядзе да псавання).

Да месца і высокая вільготнасць. Пры ёй плады не страцяць пругкасць і не стануць звялымі. А вось суседства з такой садавінай, як яблыкі і бананы, небяспечнае праз выдзяленне апошнімі газу этылену, які паскарае даспяванне і псаванне гародніны, піша «Камсамольская праўда».

Таматы ж холад не любяць. Захоўванне ў халадзільніку прывядзе да страты водару і з'яўлення «ватнага» смаку. Для памідораў добрая пакаёвая тэмпература каля 20—22 градусаў у сухім месцы, якое добра праветрываецца, без прамых сонечных промняў.

Калі гаворка ідзе пра таматы, вырашчаныя на ўласным участку, то Дзмітрый Кастрыцкі рэкамендуе здымаць плады на захоўванне ў стадыі бурай спеласці. То-бок тады, калі ў іх ужо ёсць характэрны колер, але яны не сталі цалкам мяккімі.

«У такім выглядзе яны будуць паступова даспяваць і захаваюцца да месяца».

А спосаб захоўвання — у скрынях у адзін-два слоі, але так, каб таматы зверху не ціснулі на суседзяў знізу. Вядома, варта час ад часу правяраць ураджай і прыбіраць плады, якія пачынаюць псавацца, каб гніль не ахапіла ўсё вырашчанае.

Склеп або падвал не падыходзяць для гарбуза і кабачкоў праз высокую вільготнасць, якая вядзе да гніення гэтай гародніны. Ім патрабуецца сухое памяшканне, якое добра праветрываецца, з невысокай вільготнасцю і тэмпературай каля пакаёвай.

Парада садоўніка — захоўваць гарбуз і кабачкі не на падлозе, а на паліцах або стэлажах. І так, каб плады не дакраналіся адзін да аднаго.

Што да бульбы, то добры варыянт захоўвання — склеп з тэмпературай 6—8 градусаў.

«Гэта залатая сярэдзіна: пры больш высокай тэмпературы бульба пачынае прарастаць, а пры нізкай — псуецца і становіцца саладкаватай, — кажа Кастрыцкі і паказвае таксама на неабходнасць умеранай вільготнасці: — Занадта сыра — клубні гніюць, занадта суха — вянуць».

Садоўнік раіць захоўваць бульбу ў скрынях або насыпам і пры добрай вентыляцыі (значыць, скрыні дакладна не трэба ставіць ушчыльную да сцяны), а таксама не забываць перабіраць ураджай, выдаляючы падгнілыя клубні.

З бульбай звязанае і правільнае захоўванне буракоў.

«Буракі зручна захоўваць насыпам проста паверх бульбы. Тут працуе цікавы эфект: бульба выпарае лішнюю вільгаць, а буракі яе ўбіраюць. У выніку: буракі не сохнуць, бульба не адсырэе і не згніе. Гэта простае, але вельмі эфектыўнае рашэнне, праверанае гадамі», — кажа Дзмітрый Кастрыцкі.

Патрабавальная да вільгаці і морква. Яе павінна быць дастаткова, каб гародніна не вянула. Моркву добра захоўваць у злёгку вільготным пяску або ў апілках.

• 7
• 0
• 0
• 0
• 0
• 0
• 0
• 0