Сабаленка ў Мінску вазіла жаніха на вячэру да бабулі і на шашлыкі да Максіма Мірнага
Арына Сабаленка падчас візіту ў Мінск расказала, чым яе сям’я карміла жаніха Георгіоса Франгуліса і як ён пазнаёміўся з яе бабуляй і мамай.
Сабаленка некалькі дзён гасціла ў родным горадзе, сумясціўшы адкрыццё кортаў свайго імя і трэніроўкі перад турнірам у Таронта, піша «Камсамольская праўда».
«Мы паедзем на вячэру да маёй бабулі, і яна прыгатуе найлепшыя стравы, — сказала на падлёце да Мінска Сабаленка ў інтэрв’ю YouTube-каналу First&Red. — Салацікі, мяса па-французску, курачку… А маё найлюбімейшае: нацёрты часнаком падсмажаны хлеб з сырам і памідорам. Яшчэ ўсе саленні пакаштуем. А вось селядзец пад шубай папрасіла не гатаваць, бо мы дзесьці спрабавалі і Георгіосу не зайшло. Ён вельмі любіць гуляш… Вось яго бабуля і зробіць».
Акрамя таго, у планах было і каларытнае застолле з лазняй і шашлыкамі ў доме Максіма Мірнага. Што да прагулак па горадзе, а ў Мінску Франгуліс ні разу не быў, то Арына абяцала пракаціць яго па найпрыгажэйшых месцах і заехаць у Нацыянальную бібліятэку.
«Праедземся па горадзе, паглядзім прыгожыя месцы. Сходзім у бібліятэку, я, дарэчы, там ні разу не была», — прызналася Арына.
Сабаленка сказала, што візіт дадому быў запланаваны на пяць дзён і ўсяго не паспець. На пытанне інтэрв’юера, ці не сватаўство гэта, Арына адказала, што мама з Георгіосам знаёмая — яны бачыліся ў Грэцыі.
Увогуле, зносіны будучага зяця з будучай цешчай будуюцца праз Арыну.
«У мяне ніхто не размаўляе па-англійску, таму знаёмства такое — проста паглядзець на яго ўжывую. А я перакладаю тое, што лічу патрэбным», — засмаялася Арына.
Дарэчы, бабуля Арыны жыве недалёка ад аэрапорта.
«Бабуля жыве ў пасёлку Прывольны (15 км ад МКАД. — Рэд.). Калі я прыязджаю ў Мінск, то з аэрапорта адразу еду да бабулі, гэта ўсяго толькі 20 хвілін шляху. Потым да мамы і сяброў».
Сабаленка была рада візіту дадому.
«Калі я прылятаю ў Мінск, то адчуваю, якое ў нас чыстае паветра».
Яшчэ Арына Сабаленка патлумачыла, чаму яе каманда складаецца ў асноўным з беларусаў: «Я недаверлівая і не люблю, калі мне кланяюцца».
Цяпер чытаюць
Колькасць ахвяр выбуху ў маскоўскім элітным рэстаране на юбілеі генерала, які камандаваў наступам на Кіеў з Беларусі ў 2022-м, вырасла да пяці чалавек33
Каментары
[Зрэдагавана]