Не пусцілі ў Грузію з-за паездкі ў Абхазію — беларус адсудзіў грошы ў турфірмы
Жыхар Гомеля праз суд дамогся вяртання грошай за тур у Грузію пасля таго, як яму адмовілі ва ўездзе ў краіну.
Як вынікае з матэрыялаў справы, у верасні 2025 года мужчына набыў аўтобусны тур у Грузію. Аднак на мяжы грузінскія пагранічнікі адмовілі яму ва ўездзе. Прычынай магла стаць ранейшая паездка ў Абхазію, піша abw.by.
Суд устанавіў, што яшчэ да заключэння дагавора турыст удакладняў у прадстаўніка турфірмы, ці не ўзнікнуць праблемы пры перасячэнні мяжы, паколькі раней ён наведваў Абхазію.
У адказ яму паведамілі, што калі ён сам не распавядзе пра гэтую паездку, то «ніхто пра гэта не даведаецца». Прадстаўнік турфірмы ў судзе сцвярджала: раней у туры па Грузіі ездзілі турысты, якія наведвалі Абхазію, аднак ім не забаранялі ўезд пагранічныя службы Грузіі.
Пасля адмовы ва ўездзе мужчына запатрабаваў скасаваць дагавор і вярнуць грошы, аднак турфірма адмовілася задаволіць прэтэнзіі.
Суд прыйшоў да высновы, што тураператар не прадаставіў кліенту дакладную інфармацыю пра асаблівасці ўезду ў Грузію і тым самым парушыў патрабаванні заканадаўства аб турызме і абароне правоў спажыўцоў.
У выніку дагавор аказання турыстычных паслуг быў скасаваны. З турфірмы спагналі:
- кошт туру ў памеры 1568,86 рубля;
- транспартныя выдаткі на вяртанне дадому ў суме 401,67 рубля;
- кампенсацыю маральнай шкоды ў памеры 400 рублёў.
Акрамя таго, суд прызначыў штраф у памеры 1368,86 рубля за парушэнне правоў спажыўца.
Турфірма падала апеляцыю, але Гомельскі абласны суд пакінуў рашэнне без змен. Яно ўступіла ў законную сілу.
Цяпер чытаюць
Зяленскі: Рэтранслятары на мяжы Беларусі прыпынілі працу61
Каментары