Зяленскі расказаў, што расійскія спецслужбы 11 разоў спрабавалі яго забіць
Дзеці прэзідэнта Украіны жывуць у сакрэтным месцы.
Прэзідэнт Украіны Уладзімір Зяленскі расказаў у падкасце World of Trouble брытанскай газеты Independent, што расійскія спецслужбы прынамсі 11 разоў спрабавалі яго забіць. Па меркаваннях бяспекі яму даводзіцца толькі зрэдку наведваць жонку і дзяцей, якіх яго прысутнасць можа паставіць пад пагрозу, пераказвае Bild.
Зяленскі таксама распавёў, што ягоныя дзеці адчуваюць на сабе тыя ж праблемы, што і многія дзеці ва Украіне: «Яны ходзяць у школу, яны вучацца і павінны вельмі хутка бегчы ў сховішча [падчас паветранай трывогі]». Дзеці Уладзіміра і Алены Зяленскіх, 13‑гадовы Кірыл і 21‑гадовая Аляксандра, жывуць у сакрэтным месцы — каб таксама не падвергнуцца замахам.
Сам прэзідэнт Украіны, паводле яго слоў, таксама праводзіць большую частку часу ў розных абароненых месцах. Расійскія спецслужбы назіраюць за кожным яго рухам. Паводле ягоных звестак, спецпадраздзяленні ФСБ атрымалі загад «абезгаловіць» украінскае кіраўніцтва.
Каментары