У Мінску цяпер працуе 96 мультымедыйных рэкламных экранаў. Усе яны знаходзяцца на балансе сталічнага прадпрыемства «Мінскрэклама», паведамляе агенцтва «Мінск-Навіны».
Агульная колькасць рэкламных канструкцый, якія абслугоўвае арганізацыя, перавышае 360. Іх паставілі не толькі ў межах горада, але і ўздоўж трасы М2 у кірунку Нацыянальнага аэрапорта «Мінск». За апошнія пяць гадоў іх колькасць павялічылася больш чым на траціну.
У 2026 годзе плануецца паставіць яшчэ 10 новых мультымедыйных экранаў, а таксама размясціць лайтпостары ў некаторых падземных пешаходных пераходах. Сярод планаў — абсталяванне рэкламнымі канструкцыямі пераходу каля станцыі метро «Аэрадромная» і павелічэнне іх колькасці ў пераходзе пад плошчай Якуба Коласа.
Старшыня Мінгарвыканкама Уладзімір Кухараў падкрэслівае неабходнасць шырэй выкарыстоўваць мультымедыйныя экраны ў рэкламных мэтах і распрацоўваць якасны дызайн сацыяльнай рэкламы. Паводле слоў прадстаўнікоў улады, яна павінна быць яркай, цікавай і прыцягваць увагу.
Сярод задач прадпрыемства — праектаванне, вытворчасць, размяшчэнне і абслугоўванне розных відаў вонкавай рэкламы. Таксама пастаўлена задача актывізаваць працу па прыцягненні новых кліентаў.
Каментары