Цэны на золата дасягнулі новага гістарычнага максімуму, перавысіўшы $5200 за унцыю
На піку каціроўкі лютаўскага кантракту на золата на біржы Comex выраслі на 3,14%, да $5242,2 за унцыю, сведчаць звесткі таргоў на 6:10 па мінскім часе.
Золата дасягнула новага рэкорднага ўзроўню на фоне падзення курсу даляра ЗША. Больш танны даляр падтрымлівае золата, паколькі яно становіцца больш даступным для замежных пакупнікоў, якія выкарыстоўваюць іншыя валюты, што стымулюе попыт.
У аўторак індэкс даляра DXY, які адлюстроўвае суадносіны даляра да кошыка з шасці сусветных валют, абваліўся на 1,55%, апусціўшыся на мінімуме да 95,551. На такіх узроўнях індыкатар знаходзіцца ўпершыню амаль за чатыры гады — з 10 лютага 2022 года.
У панядзелак цана золата прабіла планку 5000 даляраў за унцыю, учора ноччу — 5100, у сярэдзіне снежня было 4500.
У мінулым годзе цана золата вырасла на 64 працэнты, з пачатку гэтага года ўжо амаль на 17 працэнтаў.
Як лічаць эксперты, асноўная прычына росту золата — рост геапалітычнай напружанасці ў свеце. Да таго ж усе працягваюць чакаць чарговага зніжэння працэнтных ставак у ЗША.
Аднак што да перспектыў, меркаванні разыходзяцца. Паводле аналітыкаў, фінансавыя і геапалітычныя фактары яшчэ нейкі час будуць штурхаць цану золата ўгору. Разам з тым на рынку нарастае рызыка карэкцыі, таму далейшыя ўкладанні ў золата цяпер звязаныя з высокай верагоднасцю адкату.
Цяпер чытаюць
Пяць дзён, 60 удзельнікаў, саўна, більярд і крыкі адно на аднаго. Расказваем, як прайшла закрытая «гульня Мацкевіча»61
Каментары