Мужчына купіў кватэру ў «дармаеда» — і заплаціў за камуналку па поўным тарыфе
Чаму так атрымалася?
Андрэй нядаўна набыў жыллё ў Гомелі, расказвае выданне «Белка».
«Я купіў кватэру ў чалавека, не занятага ў эканоміцы. Камунальныя паслугі яму налічваліся па поўным кошце. Былы гаспадар высяляўся тыдзень. Прыкладна столькі ж мне спатрэбілася, каб перааформіць жыллё на сябе», — распавёў гамяльчук.
Аказалася, што ўвесь гэты час камуналку працягвалі налічваць па поўных тарыфах. «Чаму я павінен пераплачваць, калі ўсё жыццё працую?» — задаецца пытаннем мужчына.
У Разлікова-даведачным цэнтры горада Гомеля адказалі, што плацельшчыкам жыллёва-камунальных паслуг новы гаспадар кватэры становіцца толькі з моманту рэгістрацыі права ўласнасці на яе.
Парадак наступны: у Гомельскім агенцтве па дзяржаўнай рэгістрацыі і зямельным кадастры трэба зарэгістраваць пераход права ўласнасці на кватэру і атрымаць пасведчанне.
Пасля з гэтым дакументам трэба звярнуцца ў арганізацыю, якая ажыццяўляе налічэнні, для адкрыцця асабовага рахунку. Толькі тады былы ўласнік перастае быць плацельшчыкам. А значыць, камуналку пачнуць налічваць новаму гаспадару па ільготных тарыфах.
Плата за ЖКП па субсідаваных тарыфах будзе налічвацца пры ўмове, што ў жылым памяшканні маюцца зарэгістраваныя па месцы жыхарства грамадзяне. У адваротным выпадку будуць прымяняцца тарыфы, якія забяспечваюць поўнае пакрыццё эканамічна абгрунтаваных затрат.
Каментары