Украінскі журналіст назваў Наўроцкага «паханом». Яго звольнілі з польскага СМІ, а канцылярыя прэзідэнта заклікала перапісаць Канстытуцыю
Віталь Мазурэнка быў намеснікам галоўнага рэдактара партала «Observator Międzynarodowy». Але яго звольнілі за выказванне пра прэзідэнта Польшчы.
Украінскі журналіст Віталь Мазурэнка быў звольнены з польскага выдання «Observator Międzynarodowy» за выказванне пра прэзідэнта Польшчы Караля Наўроцкага.
У эфіры дыскусійнай праграмы на Polsat News Мазурэнка назваў паводзіны Наўроцкага ў дачыненні да закона аб дапамозе ўкраінскім уцекачам «паводзінамі пахана». Прэзідэнт Польшчы наклаў вета на закон і прапанаваў уласныя праўкі.
«Рыторыка і паводзіны спадара Наўроцкага — гэта не прэзідэнцкія паводзіны, а паводзіны пахана. Так называюць у расійскіх турмах крымінальнага аўтарытэта», — заявіў Мазурэнка.
Вядучая праграмы назвала выказванне Мазурэнкі аб прэзідэнце недарэчным і зняважлівым. Але той не стаў выбачацца.
«Я параўноўваю паводзіны канкрэтнага чалавека і не хачу падрываць інстытут прэзідэнта. Яго паводзіны шкодзяць безабаронным украінскім імігрантам», — сказаў журналіст.
Выказванне выклікала хуткую рэакцыю ў канцылярыі прэзідэнта Польшчы. Яе шэф Збігнеў Багуцкі заклікаў пакараць Мазурэнку за абразу прэзідэнта. Па гэтым артыкуле журналісту пагражае да трох гадоў турмы.
Багуцкі таксама адзначыў, што журналіст атрымаў польскае грамадзянства па паходжанні. Кіраўнік прэзідэнцкай канцылярыі вырашыў выкарыстоўваць гэты кейс у падтрымку законапраекта, які радыкальна ўскладняе атрыманне грамадзянства.
«Такія паводзіны ўкраінца, які атрымаў польскае грамадзянства, наглядна пацвярджае справядлівасць ініцыятывы прэзідэнта РП аб падоўжанні да 10 гадоў тэрміну пастаяннага пражывання ў нашай краіне, па выцяканні якога толькі і можна будзе падаваць заяву на атрыманне польскага грамадзянства.
Польскае грамадзянства павінна быць асаблівым гонарам і абавязкам ставіць Польшчу і яе інтарэсы на першае месца, выконваць польскія законы, а таксама паважаць канстытуцыйныя ўлады Рэспублікі Польшча, якія маюць мандат ад волі народа», — заявіў Багуцкі.
Ён заклікаў перапісаць Канстытуцыю так, каб можна было пазбаўляць людзей набытага грамадзянства ў такіх кейсах. Цяпер Асноўны закон гэта забараняе.
«Гэты выпадак з'яўляецца нагодай для пачатку сур'ёзнай дыскусіі аб увядзенні ў польскі правапарадак палажэнняў, якія рэгулююць пазбаўленне грамадзянства, набытага праз натуралізацыю, напрыклад, па ўзору рашэнняў, якія дзейнічаюць у ЗША, Германіі, а таксама ў іншых краінах. Аднак гэта патрабуе змены Канстытуцыі, і таксама па гэтай прычыне апраўданая пазіцыя прэзідэнта Наўроцкага аб неабходнасці пачаць пісаць новую Канстытуцыю», — адзначыў Багуцкі.
Да абурэння далучыліся многія палітыкі перш за ўсё з партыі «Права і справядлівасць», якая падтрымлівала Наўроцкага на выбарах. Яны заклікаюць пракуратуру заняцца журналістам. А былы намеснік міністра замежных спраў Павел Яблоньскі і зусім адправіў Мазурэнку на фронт.
«Спадар Мазурэнка, які так крыўдзіцца з нагоды нібыта адсутнасці падтрымкі Украіны з боку Польшчы, павінен у тэрміновым парадку падзякаваць за гасціннасць у нашай краіне і адправіцца на фронт — каб там самому па-сапраўднаму падтрымаць сваю радзіму», — напісаў апазіцыйны дэпутат.
У кіруючай кааліцыі больш стрыманыя ацэнкі. Дэпутат ад ліберальнай партыі «Польшча 2050» Павел Залеўскі лічыць, што пазбаўляць грамадзянства за выказванні нельга.
«Кантэкст мае значэнне. Я лічу, што Польшча, як дэмакратычная краіна, больш цярплівая да падобных заяў і нападак на палітыкаў, чым іншыя недэмакратычныя краіны.
Я б умерыў эмоцыі; яны нам не патрэбны, яны патрэбны Расіі. Гэта азначае, што ўсе антыўкраінскія эмоцыі будуць бязлітасна эксплуатаваныя Расіяй — і ў Расіі, і ў Польшчы, і на Захадзе — супраць нашых інтарэсаў», — сказаў Залеўскі.
Сёння ж Мазурэнку звольнілі з «Observator Międzynarodowy». У выданні асудзілі выказванне былога намесніка галоўнага рэдактара.
«Як польскі сайт, мы катэгарычна не прымаем і не цярпім ніякіх спробаў падарваць аўтарытэт прэзідэнта Рэспублікі Польшча. Нашы каштоўнасці заснаваныя на дакладнай журналістыцы, адказнасці за свае словы і поўнай павазе да інстытутаў польскай дзяржавы і яе прадстаўнікоў.
Мы рады паведаміць вам, што мы прынялі рашэнне аб неадкладным спыненні супрацоўніцтва з Віталем Мазурэнкам. Ён таксама пакідае пасаду намесніка галоўнага рэдактара нашай рэдакцыі», — гаворыцца у заяве рэдакцыі.
Праз пару гадзін Мазурэнка папрасіў прабачэння ў фэйсбуку за сваё выказванне.
«Як грамадзянін Рэспублікі Польшча, я хацеў бы падкрэсліць, што з цалкам павагай стаўлюся да дзяржаўных інстытутаў на чале з прэзідэнтам Рэспублікі Польшча. Прашу прабачэння ва ўсіх, чые пачуцці маглі быць зачэплены маімі словамі», — напісаў Мазурэнка.
Віталь Мазурэнка жыве ў Польшчы з 2016 года, у 2019-м атрымаў грамадзянства. Ён шмат гадоў супрацоўнічаў «Observator Międzynarodowy». Паводле адукацыі Мазурэнка юрыст.
Каментары