Былы ўплывовы алігарх з Малдовы Уладзімір Плахатнюк, які цяпер арыштаваны ў Грэцыі за ўдзел у адмыванні грошай праз схему пад назвай «малдаўскі ландрамат» (каля $20 мільярдаў расійскіх карупцыйных сродкаў), неаднаразова наведваў Маскву і Мінск з падробленым пашпартам. Паводле расследавання выдання The Insider, ён выкарыстоўваў фальшывае імя — Міхаіл Таўшанаў — і пры гэтым сустракаўся з высокапастаўленымі асобамі з Крамля.
Згодна з аўдыёзапісамі, з сярэдзіны 2024 года Плахотнюк вёў перамовы з намеснікам кіраўніка Адміністрацыі прэзідэнта Расіі Дзмітрыем Козакам. Крэмль разглядаў Плахотнюка як важнага гульца, які мог бы паўплываць на выбары ў Малдове. Апошні візіт Плахатнюка ў Маскву адбыўся ў красавіку 2025 года.
Пры затрыманні ў Плахатнюка знайшлі больш за 20 фальшывых дакументаў, у тым ліку ўкраінскія, расійскія і балгарскія пашпарты. Ён свабодна перамяшчаўся пад фальшывым іменем і нават атрымліваў індывідуальнае абслугоўванне ў маскоўскім гатэлі «Нацыяналь». За доступ у фітнэс ён плаціў асобна, каб знаходзіцца там аднаму, а масажны кабінет яму параілі не наведваць, бо там працавала жанчына з Малдовы, якая магла яго пазнаць.
У чэрвені 2024 года Плахатнюк таемна прыляцеў у Маскву, каб сустрэцца з Дзмітрыем Козакам. Яго сустрэчу арганізоўваў былы расійскі гандлёвы прадстаўнік у Малдове, які гаварыў пра гэта ў прыватных размовах. Падчас візіту Плахатнюк практычна не пакідаў гатэльны нумар і насіў кепку з нізкім казырком ды сонцаахоўныя акуляры, каб пазбегнуць апазнання.
Перамовы тычыліся вяртання Плахотнюка ў палітычнае жыццё Малдовы. Козак нібыта папракнуў яго, што краіна ў заняпадзе часткова з ягонай віны, бо раней ён меў усю ўладу, але яе страціў. Плахатнюк адказаў, што гатовы вярнуцца і дапамагчы, але без падтрымкі не справіцца.
Мяркуючы па праслухоўках, наступная сустрэча Плахатнюка і Козака адбылася ўжо праз тыдзень — у Мінску.
Як відаць з даных аб пералётах алігарха, яна таксама была далёка не апошняй. З тым жа пашпартам на імя Таўшанава Плахатнюк прылятаў у Маскву ў ліпені і кастрычніку 2024 года, а таксама ў сакавіку і красавіку 2025 года. Увесь гэты перыяд быў вельмі бурным для малдаўскай палітыкі і для Крамля, які актыўна спрабаваў на яе паўплываць.
Крамлёўская падтрымка Плахатнюка была часткай шырэйшай стратэгіі ўплыву на малдаўскія выбары. У 2024 годзе, напярэдадні рэферэндуму па еўраінтэграцыі і прэзідэнцкіх выбараў, Расія падтрымлівала алігарха Ілана Шора, які арганізаваў раздачу грошай выбарцам — наяўнымі, банкаўскімі картамі, падарожжамі і харчаваннем — каб схіліць галасы на карысць прарасійскіх кандыдатаў.
Калі гэта не спрацавала, Крамль пераключыўся на стварэнне двух супрацьлеглых палітычных блокаў — адзін адкрыта прарасійскі (у яго ўваходзяць Ігар Дадон, Уладзімір Варонін, Ірына Влах і Васіле Тарлеў), а іншы нібыта праеўрапейскі, але з палітыкамі, звязанымі з Плахатнюком. Такім чынам Расія спадзяецца ахапіць як мага большую частку выбарцаў з розных лагераў.
У Грэцыі па запыце Малдовы затрымалі алігарха Плахатнюка
Мая Санду абвінаваціла Расію ва ўмяшанні ў парламенцкія выбары ў Малдове
У Малдове адмовіліся рэгістраваць выбарчы блок, які правёў свой з'езд у Маскве
Былы прэзідэнт Малдовы марыць пасля выбараў аднавіць адносіны з Лукашэнкам
Прэзідэнт Малдовы агучыла інфармацыі пра план дэстабілізацыі краіны. У ім мелі ўдзельнічаць і грамадзяне Беларусі
Цяпер чытаюць
Ці выйдзе біяграфія Пазняка і ў чым галоўная праблема беларускай літаратуры? Янушкевіч — пра тыражы і канкурэнцыю з рускай кнігай15
Ці выйдзе біяграфія Пазняка і ў чым галоўная праблема беларускай літаратуры? Янушкевіч — пра тыражы і канкурэнцыю з рускай кнігай
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі3939
Каментары