Памёр беларускі грамадскі дзеяч у ЗША Вячка Станкевіч, паведаміла ў фэйсбуку даследчыца беларускай эміграцыі Наталля Гардзіенка. Яму было 92 гады. Сярод іншага ён 10 гадоў узначальваў Беларускую службу «Радыё Свабода».
Вячка Станкевіч нарадзіўся ў Вільні 15 верасня 1932 года ў сям'і вядомага мовазнаўцы і грамадскага дзеяча Янкі Станкевіча ды ягонай жонкі Марыі, паводле паходжання чэшкі.
У 1949 годзе разам з бацькамі Вячка Станкевіч прыехаў у ЗША. Спачатку пасяліўся ў Мінесоце, пазней жыў у Кліўлендзе, дзе ўдзельнічаў у стварэнні беларускай футбольнай каманды «Пагоня». У 1951—1954 гадах служыў у амерыканскім войску, пасля вяртанні з якога жыў у Нью-Ёрку.
У 1959 годзе скончыў Нью-Ёркскі гарадскі каледж з дыпломам інжынера-электроніка. У 1968 годзе у Ньюарскім інжынерным каледжы (Нью-Джэрсі) атрымаў ступень магістра інжынэрыі. Гуляў за нью-ёркскую футбольную каманду «Беларусь». Быў актыўным сябрам Згуртавання беларускай моладзі ў Амерыцы, старшынёй яго нью-ёркскага аддзела, пазней старшынёй Галоўнай управы. Працаваў інжынерам у карпарацыях ITT і WesternUnion. У 1963—1966 гадах у сувязі з працай жыў у Заходняй Еўропе, пазней вярнуўся ў Нью-Ёрк.
Быў сябрам Беларуска-Амерыканскага задзіночання, уваходзіў у кіраўніцтва арганізацыі (старшыня Галоўнай управы ў 1969—1971 і 2007—2011 гадах). У 1988—1998 гадах быў кіраўніком Беларускай службы «Радыё Свабода». Пасля вярнуўся ў ЗША.
У 2003 годзе пераняў кіраванне Фундацыяй імя Льва Сапегі. Радны БНР, быў абраны заступнікам старшыні Рады. У 2009—2018 гг. быў старшынёй Беларускай фундацыі Пятра Крачэўскага. У 2013 годзе разам з жонкай заклаў фундацыю Monroe-Vilnia Foundation для падтрымкі розных беларускіх праектаў.
Пракуратура пра смерць Мелказёрава: журналіст меў хранічную хваробу17
Каментары