Кампанія Mattel прадставіла першую ляльку Барбі з дыябетам 1 тыпу. У кампаніі заявілі, што імкнуцца развіваць у дзяцей пачуцці эмпатыі і інклюзіўнасці, а таксама спадзяюцца, што навінка дапаможа дзецям з дыябетам адчуваць сябе больш упэўнена, паведамляе Бі-бі-сі.
Новая лялька створана ў супрацоўніцтве з міжнароднай некамерцыйнай арганізацыяй Breakthrough T1D, якая займаецца падтрымкай людзей з дыябетам 1 тыпу.
«З’яўленне Барбі з дыябетам 1 тыпу — гэта важны крок у нашым імкненні да інклюзіўнасці і рэпрэзентацыі», — заявіла старэйшая віцэ-прэзідэнтка і глабальная кіраўніца брэнда Barbie Крыста Бергер.
«Барбі дапамагае фармаваць ранняе ўспрыманне свету ў дзяцей. Паказваючы такія стану, як дыябет 1 тыпу, мы дазваляем большай колькасці дзяцей пазнаваць сябе ў гісторыях і ляльках, якіх яны любяць», — дадала яна.
Дыябет 1 тыпу — гэта аўтаімуннае захворванне, пры якім арганізм знішчае клеткі падстраўнікавай залозы, што выпрацоўваюць інсулін. Яго часта дыягнастуюць у дзяцінстве, і пацыентам неабходна штодзённа кантраляваць узровень цукру ў крыві і ўводзіць інсулін.
Новая Барбі носіць CGM — маленькую прыладу на руцэ, якая бесперапынна вымярае ўзровень цукру ў крыві. Яна замацавана на плячы з дапамогай ружовага медыцынскага пластыра ў форме сэрцайка, а на тэлефоне лялькі — прыкладанне, якое кантралюе ўзровень цукру на працягу дня.
Таксама ў лялькі ёсць інсулінавая помпа — невялікая прылада, якая аўтаматычна ўводзіць у арганізм неабходную колькасць інсуліну. Яна прымацавана да таліі лялькі.
Адзенне новай Барбі — сіняя кофта і спадніца ў гарошак — натхнёнае міжнароднай сімволікай, звязанай з асвядомленасцю пра дыябет.
Разам з новай мадэллю кампанія таксама прадставіла ляльку Лілы Мос — дачкі брытанскай супермадэлі Кейт Мос, якой дыягнаставалі дыябет у 12 гадоў.
У лялькі Лілы Мос тыя ж аксэсуары CGM для бесперапыннага маніторынгу ўзроўню глюкозы.
Ліла Мос заявіла, што яна шчаслівая, што тэхналогіі, якімі карыстаецца яна і іншыя маладыя людзі з дыябетам кожны дзень, цяпер ёсць і ў Барбі.
«Я лічу, што вельмі важна прыняць гэтыя тэхналогіі, бо з імі жыць з дыябетам становіцца значна прасцей і зручней. Думаю, вельмі важна не хаваць гэтыя прылады, а наадварот — ганарыцца імі», — заявіла 22-гадовая мадэль.
У апошнія гады Mattel імкнецца разнастаіць сваю лінейку лялек, у прыватнасці ляльку Барбі, якая дзесяцігоддзямі была прадстаўлена ў выглядзе стройнай бландзінкі на абцасах.
У 2016 годзе кампанія ўпершыню прадставіла Барбі «пышных формаў», а таксама «мініяцюрную» і «высокую» лялек. У 2019 годзе з’явілася лінейка гендэрна-нейтральных лялек і лялек Барбі з інваліднасцю.
Таксама Mattel выпусціла лялек з іншымі асаблівасцямі — напрыклад, ляльку з парушэннямі зроку і ляльку з сіндромам Даўна.
Дзяржаўныя сацыёлагі: Беларусы найперш звязваюць сваю дзяржаўнасць з Вялікім Княствам Літоўскім24
Каментары