Мінздароўя стварыла камісію па расследаванні гібелі 14-гадовай школьніцы ў бальніцы ў Ельску
Мінздароўя праводзіць службовае расследаванне па выпадку смерці падлетка ў Ельскай ЦРБ, паведаміў журналістам начальнік галоўнага ўпраўлення арганізацыі медыцынскай дапамогі Мінздароўя Леанід Нядзень.
«У Мінздароўі створана рэспубліканская камісія. Групай экспертаў ведамства праводзіцца медыцынскае службовае расследаванне, вывучаюцца ўсе матэрыялы здарэння», — сказаў Леанід Нядзень.
Паводле яго слоў, таксама праводзіцца вывучэнне ўсіх фактаў, выкладзеных у інтэрнэт-прасторы і выяўленых працоўнай групай на дадзены момант.
Пра смерць 14-гадовай школьніцы стала вядома на мінулым тыдні. Да таго як трапіць у бальніцу, дзяўчынка чатыры дні была на бальнічным — з кашлем і болямі ў горле.
16 мая яна ішла закрываць бальнічны, бо адчувала сябе добра, тэмпературы не было. Яна нават паспела паведаміць класнай кіраўніцы, што гатовая вярнуцца да заняткаў.
Дзяўчынку суправаджала маці, яны разам даведаліся: трэба шпіталізавацца, бо ў лёгкіх былі хрыпы. Каля 10-й гадзіны раніцы падлетка накіравалі ў бальніцу. Перад афармленнем яна зайшла да бабулі, каб сабраць рэчы. Прыкладна да 11-й гадзіны дзяўчынка была ў бальніцы.
Па словах бацькі, у 13:35 бацькам патэлефанавалі і паведамілі, што дзіця ў коме ў рэанімацыі.
А 17:30—17:40 прыехаў рэанімацыйны аўтамабіль з Мазыра, аднак было прынята рашэнне чакаць спецыялістаў з Гомеля — яны прыехалі прыкладна ў 23:30. Яшчэ за 2,5 гадзіны да гэтага (каля 21:00) бацькоў папярэдзілі, што трэба рыхтавацца да найгоршага: у дзіцяці неаднаразова спынялася сэрца.
А 23:50 бацьку паведамілі, што дзяўчынка памерла.
Цяпер чытаюць
Бабарыка тры хвіліны адказваў на пытанне, чый Крым. Так і не адказаў89
Каментары