У фінале чэмпіянату свету па пляжным футболе беларусы згуляюць з бразільцамі
Сёння беларускія футбалісты-пляжнікі пасля перамогі над зборнай Сенегала ўпершыню ў гісторыі выйшлі ў фінал чэмпіянату свету. Цяпер жа сталі вядомыя і іх супернікі ў галоўным матчы спаборніцтваў, якія праходзяць на Сейшэльскіх астравах.
Заўтра беларусы згуляюць са зборнай Бразіліі, дзейным чэмпіёнам свету. Бразільцы сёння ў другім паўфінале абыгралі зборную Партугаліі з лікам 4:2.
За бронзу чэмпіяната свету пазмагаюцца, адпаведна, зборныя Сенегала і Партугаліі. Беларусы сёння абыгралі сенегальцаў з лікам 5:2.
Бразільцы з'яўляюцца ажно 15-разовымі пераможцамі чэмпіянатаў свету па пляжным футболе. Гэта абсалютны рэкорд сусветнага першынства, які дагэтуль праводзіўся ўсяго 22 турніры. У той жа час найвышэйшае да сёлетняга чэмпіянату месца беларусаў на ЧС — чацвёртае ў 2024 годзе ў Дубаі (ААЭ).
Каментары