Студэнты-аматары запусцілі ў космас гіпергукавую ракету ўласнай вытворчасці
Студэнты Лабараторыі ракетнага руху пры Універсітэце Паўднёвай Каліфорніі (USCRPL) паставілі новы сусветны рэкорд сярод аматарскіх і некамерцыйных ракет, адправіўшы сваю ракету Aftershock II на вышыню 143 кіламетры.
Аматарская гіпергукавая ракета Aftershock II, запушчаная 20 кастрычніка з пустыні Блэк-Рок у штаце Невада, ЗША, была абсталяваная самым магутным цвердапаліўным рухавіком, калі-небудзь створаным непрафесіяналамі, і здолела дасягнуць хуткасці 1610 м/с, пераадолеўшы так званую лінію Кармана — мяжу, якая ўмоўна аддзяляе атмасферу Зямлі ад космасу (на вышыні каля 100 кіламетраў над узроўнем мора), піша партал Interesting Engineering са спасылкай на справаздачу студэнтаў Універсітэта Паўднёвай Каліфорніі.
«У трохметровай ракеце вагой 149 кг і дыяметрам 22 см выкарыстоўваліся перадавыя тэхналогіі, уключаючы сучасную авіёніку, сістэму цеплавой абароны і кампазітныя матэрыялы. Асаблівая ўвага была нададзена абароне ад высокіх тэмператур: ракета была пакрытая тэрмаўстойлівай фарбай, а стабілізатары абсталяваныя тытанавымі элементамі, якія прадухілілі знос канструкцыі», — сказана ў даследаванні.
Акрамя таго, каманда студэнтаў распрацавала электронныя сістэмы для маніторынгу дынамікі палёту ў рэжыме рэальнага часу, што дазволіла дакладна адсочваць траекторыю і аптымізаваць працэс аднаўлення ракеты пасля пасадкі.
Упершыню студэнты USCRPL пераадолелі лінію Кармана ў 2019 годзе з ракетай Traveler IV, але новы рэкорд Aftershock II стаў значным крокам у іх праекце па развіцці тэхналогій аматарскай касманаўтыкі.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі1212
Каментары