Аб’яднанні палякаў на Беларусі «павінны дамовіцца самі, а не шукаць дзесьці падтрымкі». Пра гэта заявіў кіраўнік МЗС Беларусі Сяргей Мартынаў у інтэрв’ю польскай газеты Rzeczpospolita ад 10 лютага.
Паводле слоў Мартынава, арганізацыі павінны самастойна «вырашыць свае праблемы, у тым ліку праблемы з людзьмі, якіх не задаволіў вынік выбару кіраўніцтва». Ён заявіў, што беларускі ўрад і міністэрства замежных спраў «не займаюцца такімі пытаннямі».
«Умяшанне беларускай дзяржавы, а тым больш польскай, ні да чаго добрага не прывядзе», — мяркуе міністр.
Пры гэтым Мартынаў падкрэсліў, што Беларусь і Польшча — «важныя партнёры». Так, да сусветнага эканамічнага крызісу гандлёвы абарот дасягнуў 3 млрд. долараў. Ён адзначыў, што Мытны саюз Беларусі, Расіі і Казахстана адкрывае польскім бізнесменам «вялікі рынак».
Міністр выказаў надзею, што падчас візіту ў Варшаву, які плануецца на 12 лютага, будзе падпісана беларуска‑польскае пагадненне аб малым пагранічным руху. Паводле яго слоў, Беларусь гатовая да зніжэння кошту віз па прынцыпу ўзаемнасці.
***
Адносіны паміж Мінскам і Варшавай абвастрыліся пасля канфлікту ў Івянцы (Валожынскі раён, Мінская вобласць).
Мясцовы Дом польскі не могуць падзяліць два крылы Саюза палякаў на Беларусі (СПБ) — афіцыйнае і незарэгістраванае. Кожны з бакоў сцвярджае, што мае права на ўласнасць.
8 лютага судовыя выканаўцы зрабілі вопіс маёмасці Дома польскага і выправадзілі з будынка актывістаў неафіцыйнага СПБ. Кіраўніцтва арганізацыі расцаніла гэта як «захоп» і звярнулася па падтрымку да польскіх улад.
Сітуацыя ў Івянцы стала прычынай дыпламатычнага скандалу. Пасол Беларусі ў Польшчы Віктар Гайсёнак быў выкліканы ў польскае МЗС, дзе яму выказалі занепакоенасць дзеяннямі беларускіх праваахоўных органаў у дачыненні да Дома польскага. У сваю чаргу, пасол Польшчы ў Беларусі Хенрык Літвін быў на два дні адкліканы для кансультацый у Варшаву.
Прэзідэнт Польшчы Лех Качыньскі запрасіў лідэра неафіцыйнага СПБ Анжаліку Борыс на сустрэчу. Чакаецца, што яна адбудзецца на наступным тыдні.
Трэба таксама адзначыць, што польская апазіцыйная партыя «Права і справядлівасць», якую ўзначальвае Яраслаў Качыньскі, брат прэзідэнта Польшчы Леха Качыньскага, запатрабавала адмяніць візіт Мартынава, а таксама заклікала прэм’ер‑міністра Дональда Туска звярнуцца ў ЕС з прапановай накласці на Беларусь гандлёвае эмбарга.
Каментары