«За раз сабраў 500 грыбоў!» Беларус навучыўся беспамылкова вызначаць суперураджайныя паляны
Аляксандр Гарбацэвіч — блогер, супрацоўнік IT-кампаніі і грыбнік, які добра ведае, як дасягнуць поспеху ў ціхім паляванні.
«З дзяцінства хадзіў з бацькам па грыбы, калі прыязджаў з ім на яго радзіму — у вёску Маставая Пухавіцкага раёна, акружаную лесам. Як там не паблукаць з кошыкам? А мой дзядзька, якога ніколі не падводзіла грыбная ўдача, наогул на гэтым умудраўся нядрэнна зарабляць», — расказвае Аляксандр Гарбацэвіч БелТА.
Сам ён асабліва палюбіў ціхае паляванне пасля таго, як гадоў 10 таму з сям'ёй адправіліся ў новае месца і там раптоўна знайшлі паляны, усыпаныя баравікамі. Тады набралі каля 400 баравікоў на чатырох чалавек.
«Такое я бачыў упершыню! Ужо тады зразумеў, што хачу знайсці зноў такія фантастычныя паляны. Стаў часцей наведвацца ў лес. Асноўнай мэтай было вывучэнне прычын і заканамернасцей з'яўлення ў тых ці іншых мясцінах грыбоў і аналогіі іх паўтарэння. Для мяне гэта стала суперзадачай, якую хацелася што б там ні было вырашыць. І з цягам часу я гэта зрабіў: навучыўся беспамылкова знаходзіць грыбныя лакацыі», — запэўнівае Аляксандр.
Для пошуку такіх палян IT-спецыяліст выкарыстоўвае каля васьмі навукова дакладных фактараў. Сярод іх карта ападкаў, перападу тэмператур на мясцовасці. Астатняе субяседнік расказваць не стаў — сакрэт майстра.
«Аналізуючы сітуацыю, выязджаю на месца і знаходжу там дзясяткі маладых грыбоў баравікоў. Відовішча, я вам скажу, класнае!» — не тоіць захаплення Аляксандр.
Як недасведчанаму грыбніку, у якога няма сваіх метак ураджайных мясцін, вызначыць удачны напрамак?
«Сачыце за картай дажджоў на Яндэкс-анлайн, — раіць наш герой. — Ападкі — самае важнае для з'яўлення грыбоў. Гэтак жа як і начны спад пасля дажджу тэмпературы да 8-9 градусаў. Гэта тэмпературна-вільготнасная правакацыя, якая выклікае ў грыбніцы стрэс. Яна ўспрымае гэту правакацыю як сігнал, што насталі неспрыяльныя ўмовы і трэба размнажацца. Таму калі на момант паніжэння тэмпературы ў рэгіёне апошнія некалькі дзён ішлі дажджы, значыць, грыбы з'явяцца на паверхні зямлі на працягу 10-14 дзён».
Пік сезону для збору грыбоў — ліпень, жнівень, верасень. У гэты час іх столькі, што пасля наведвання лесу Аляксандру, як некалі яго дзядзьку, на хобі ўдаецца нядрэнна зарабіць. З кошыкам, поўным грыбоў, ён гандлюе на Камароўскім рынку.
«Прадаць грыбы не праблема, але выйграюць тыя, хто трапіў на першую хвалю. У сярэдзіне ліпеня мінулага года грыбоў у лесе было яшчэ мала. Тады на Камароўцы гандлявалі толькі лісічкамі. А аднойчы раніцай нехта прывёз каля 200 літраў маладых баравікоў і выставіў на іх цэннік 100 рублёў за кіло. Людзі сталі купляць: засумавалі па баравіках», — гаворыць блогер.
Адзін з самых памятных Аляксандру паходаў у лес адбыўся ў мінулым годзе: «Гэта было нешта неверагоднае: у лясочку 100 на 200 метраў сабралі амаль 500 маладых дубовых баравікоў! Гэта цэлая гара!»
Дарэчы, блогер заўсёды вельмі старанна рыхтуецца да наведвання лесу. Абавязкова спампоўвае карту мясцовасці, а часцей перамяшчаецца з навігатарам. «Загадзя клапачуся аб тым, каб тэлефон быў поўнасцю зараджаны. Лічу, што сапраўднаму грыбніку ў лесе заблукаць нельга. А калі ваджу па ім турыстаў, раю ім трымацца адзін за аднаго, далёка не разыходзіцца», — расказвае ён.
Мары Аляксандра, дарэчы, таксама з грыбной сферы: ён хоча калі не палепшыць, то паўтарыць самую ўраджайную знаходку — знайсці на адной палянцы вельмі шмат баравікоў. «Думаю, мая найлепшая грыбная паляна яшчэ наперадзе!» — рэзюмуе блогер.
Мсціслаў Мекта: яшчэ адзін рэцыдывіст рвецца ва ўладу, прыкінуўшыся спецназаўцам-ябацькам15
Каментары