Ведаеце, хто абганяе «Барселону» ў чэмпіянаце Іспаніі? Заштатны клуб з двума ўкраінцамі ў складзе
Пасля 15 тураў іспанскага чэмпіяната першае месца з мадрыдскім «Рэалам» дзеліць непрыметная «Жырона». Нават легендарная «Барселона» знаходзіцца ў табліцы ніжэй. Чым адметная «Жырона»? У яе складзе два перспектыўныя ўкраінцы.
«Жырона» ідзе да чэмпіёнства з зайздроснай стабільнасцю. Хаця каманда часта і прапускае першай, яна нярэдка дасягае станоўчага выніку ў гульні і мае найлепшы паказчык па забітых мячах у Ла Лізе. Цяпер «Жырона» можа пахваліцца аднолькавай колькасцю ачкоў (38) з лідарам — мадрыдскім «Рэалам», але каралеўскі клуб абганяе «Жырону» па розніцы забітых і прапушчаных мячэй.
Сярод аўтараў поспеху — два ўкраінцы. Перш за ўсё гэта нападаючы Арцём Доўбік. Доўбік гуляе за іспанцаў са жніўня 2023-га, а сума яго трансфера — 7 мільёнаў еўра — стала найвялікшай у гісторыі «Жыроны». Папулярнае спартовае выданне Marca назвала Арцёма адным з адкрыццёў гэтага сезона Ла Лігі.
Прычым поспех Доўбіка нечаканы. Яму ўжо 26 гадоў, ён доўга гуляў у чэмпіянаце Украіны, а калі некалькі гадоў таму паехаў скараць еўрапейскі футбол, то атрымалася абы-што — 3 галы ў не самым моцным чэмпіянаце Даніі.
Яго партнёр па камандзе і па зборнай Украіны — Віктар Цыганкоў, якому таксама 26 гадоў. Ён перабраўся ў «Жырону» з кіеўскага «Дынама» ў студзені 2023-га за пяць мільёнаў еўра.
Незвычайны факт з біяграфіі спартсмена — Цыганкоў нарадзіўся ў Ізраілі, дзе ў той час гуляў яго бацька, таксама прафесійны футбаліст.
Цыганкоў гуляе ў паўабароне, але забівае дастаткова шмат, на яго рахунку ўжо больш за 100 галоў за кар'еру, гэта нават больш, чым у Доўбіка.
Яшчэ не прайшло і паловы чэмпіянату, і выніковае месца «Жыроны» можа быць зусім не топавым. Але на сёння сезон 2023/24 — найлепшы ў гісторыі клуба. Да 2016 года каманда з гэтага статысячнага каталонскага горада ніколі не выступала ў вышэйшай лізе чэмпіянаце Іспаніі, а яе найлепшыя вынікі дагэтуль — дзясятае месца ў папярэдніх сезонах
Эксперты бачаць некалькі прычын у такога поспеху іспанцаў. Перш за ўсё, клуб уваходзіць у эмірацкі спартовы холдынг City Football Group. Гэта дае «Жыроне» магчымасць карыстацца досведам іншых клубаў холдынга, у тым ліку і флагмана «Манчэсцер Сіці», а таксама браць да сябе таленавітых маладых гульцоў, якія чымсьці не падышлі для іншых клубаў. Добрая скаўцкая праца таксама дапамагла «Жыроне» завабіць да сябе Доўбіка і Цыганкова.
Акрамя паспяховых трансфераў, справа яшчэ і ў паспяховым тактычным стылі, які выпрацаваў коўч «Жыроны» Мічэл. Яны граюць дзёрзка і ўпэўнена, робяць стаўку на татальную атаку. Таксама сярод моцных бакоў «Жыроны» адзначаюць іх кантроль над тэмпам гульні і пастаяннае імкненне валодаць мячом, як і файную рэалізацыю галявых момантаў.
«Наша Нiва» — бастыён беларушчыны
ПАДТРЫМАЦЬЦяпер чытаюць
Айцішнік і былы палітвязень Віктар Куўшынаў прадае за 850 тысяч еўра дом у Партугаліі, які пабудаваў паўтара года таму ФОТЫ5
Каментары