Пасля даносаў прарасійскіх актывістаў папулярнаму сярод падлеткаў блогеру Дзім Дзімычу забаранілі выступаць у школах
Блогеру Дзмітрыю Сіўчыку, вядомаму пад псеўданімам Дзім Дзімыч, забаранілі ўдзельнічаць у школьных мерапрыемствах. Адказ ад Міністэрства адукацыі апублікавала ў сваім канале гродзенская прапагандыстка Вольга Бондарава.
У адказе на імя нейкай Алены Васільеўны гаворыцца, што Мінадукацыі на даручэнне Апарата Савета Міністраў Рэспублікі Беларусь разглядзела яе зварот, які «паступіў з Адміністрацыі Прэзідэнта Рэспублікі Беларусь ».
«Па выніках разбору кіраўнікам устаноў адукацыі было ўказана на недапушчэнне ўдзелу ў мерапрыемствах забаўляльнага характару артыстаў, творчасць якіх можа негатыўна паўплываць на фарміраванне сістэмы духоўна-маральных і маральна-этычных каштоўнасцяў у непаўналетніх», — гаворыцца ў адказе.
У лісце, падпісаным начальнікам Галоўнага ўпраўлення выхаваўчай работы і моладзевай палітыкі Віктарам Доўнарам, адзначаецца, што ў 2023 годзе быў толькі адзін факт удзелу гэтага блогера ў школьным мерапрыемстве.
Чыноўнік напісаў, што гэта пытанне знаходзіцца на кантролі ў Мінадукацыі.
«20 кастрычніка 2023 года на нарадзе з намеснікамі начальнікаў галоўных упраўленняў адукацыі абласных выканаўчых камітэтаў дадаткова будзе звернутая ўвага на недапушчэнне ўдзелу ў мерапрыемствах Дзмітрыя Сіўчыка», — дадаў Доўнар.
Паводле яго, Мінадукацыі «падтрымлівае меркаванне адносна таго, што выкарыстанне вобраза Дзмітрыя Сіўчыка, які характарызуецца негатыўнымі выказваннямі і сацыяльна неўхваляльнымі паводзінамі ў публічнай прасторы» можа «неспрыяльна адбівацца на развіцці і станаўленні асобы непаўналетніх».
Чыноўнік падзякаваў аўтару звароту за неабыякавае стаўленне да пытанняў выхавання дзяцей і моладзі.
Дзіма Сіўчык — папулярны блогер. У яго ютуб-канала 6 мільёнаў падпісчыкаў, а ў тыктоку — 2 мільёны. Асноўная яго аўдыторыя — падлеткі.
Дзяржаўныя органы і прапаганда звярнулі на яго ўвагу пасля даносаў прарасійскай актывісткі Вольгі Бондаравай. Тая абуралася, што блогер адзяваецца ў ружовае, а ў некаторых жартаўлівых роліках быў у сукенцы, і вінаваціла яго ў прапагандзе ЛГБТ.
Пасля яе скаргаў з сайта «Еўраопта» знялі рэкламу з Дзім Дзімычам, а яго самога адправілі ў эфір да прапагандыста Рыгора Азаронка.
Пазней блогера-мільённіка выклікалі ў Міністэрства культуры. «Там мы паразмаўлялі наконт майго кантэнту, унеслі правільныя карэкціроўкі», — распавёў блогер у інстаграме.
Цяпер чытаюць
Сямейная драма аднаго з самых вядомых клоўнаў Беларусі — жонка аддала Вадзіку Ракеце двухгадовага сына і сышла10
Каментары