Вялікабрытанія, Данія, Нідэрланды і ЗША сумесна дадуць Украіне сотні ракет для СПА
Міністры абароны Вялікабрытаніі, Даніі, Нідэрландаў і ЗША ў чацвер абвясцілі пра сумеснае і тэрміновае наданне Украіне сродкаў супрацьпаветранай абароны, каб засцерагчыся ад расійскіх нападаў. Пра гэта гаворыцца ў сумеснай заяве чатырох міністраў, якую цытуе «Еўрапейская праўда».
Як паведаміла брытанскае Мінабароны, у рамках сумеснай ініцыятывы Украіна атрымае «сотні зенітных ракет малой і сярэдняй далёкасці і спадарожных сістэм», прычым іх перадача ўжо пачалася і павінна завяршыцца праз некалькі тыдняў.
Гэтыя ракеты неабходныя «для абароны крытычна важнай нацыянальнай інфраструктуры Украіны і далейшага забеспячэння поспеху контрнаступальных аперацый у найбліжэйшыя месяцы», як дадаюць у Мінабароны Вялікабрытаніі.
У сваю чаргу, выканаўца абавязкаў міністра абароны Даніі Трульс Лунд Поўльсэн заявіў, што ягоная краіна плануе перадаць дадатковыя 21,9 мільярда крон (2,94 мільярда еўра) для ўзначаленага Вялікабрытаніяй Міжнароднага фонду для Украіны цягам наступных некалькіх гадоў.
Пра сумесныя пастаўкі сродкаў СПА стала вядома падчас трынаццатага пасяджэння кантактнай групы па пытаннях абароны Украіны ў фармаце «Рамштайн» у Бруселі.
Напярэдадні стала вядома, што Міністэрства абароны Нідэрландаў набудзе чатыры радыёлакацыйныя сістэмы пасіўнага назірання VERA-EG коштам 150 мільёнаў еўра для Украіны.
Цяпер чытаюць
Пісьменніца Таццяна Заміроўская расказала пра новую кнігу, сны пра Лукашэнку, кошт жыцця ў Нью-Ёрку і тое, чаму злуе на некаторых беларусаў3
Каментары