Распрацоўшчык ЗРК Patriot перадасць Украіне яшчэ пяць комплексаў. У кампаніі задаволеныя, як яны выкарыстоўваюцца
Амерыканская кампанія Raytheon Technologies, якая распрацоўвае ЗРК Patriot, мае намер адправіць ва Украіну яшчэ пяць комплексаў да канца 2024 года. Пра гэта ў інтэрв'ю The Wall Street Journal (WSJ) заявіў кіраўнік карпарацыі Грэг Хейс.
Па словах гендырэктара Raytheon, у кампаніі былі «вельмі здзіўленыя» эфектыўнасцю комплексаў супрацьпаветранай абароны Patriot ва Украіне. Разам з іншымі сістэмамі СПА яны перахоплівалі 90% снарадаў.
Хейс адзначыў, што Украіна змяніла праграмнае забеспячэнне Patriot, каб сістэма магла адсочваць і знішчаць гіпергукавыя ракеты, якія ляцяць у два разы хутчэй, чым тыя, для якіх яе першапачаткова распрацавалі.
Менавіта з ЗРК Patriot былі збітыя расійскія гіпергукавыя ракеты «Кінжал», якія, як лічылася, нельга перахапіць. Гэта падзея выклікала ажыўленае абмеркаванне ў Мінабароны ЗША, распавядала CNN высокапастаўленая вайсковая крыніца ў Вашынгтоне.
Раней, запускаючы гэтыя ракеты, Расія была ўпэўненая, што яны без праблем паразяць цэлі. Але цяпер гэтыя разлікі зламаныя, тлумачыў суразмовец выдання.
Пры гэтым перахоп «Кінжала» паказаў, што Patriot здольны збіваць не толькі балістычныя, але і ракеты паветранага базавання, што раней дапускалася толькі тэарэтычна, адзначаў ён.
Цяпер ва Украіне знаходзіцца два комплексы Patriot: адзін перадалі ЗША, а другі — Германія і Нідэрланды. Паведамлялася, што адзін з іх быў пашкоджаны ў выніку расійскай атакі. Пазней, аднак, высветлілася, што пашкоджанне неістотнае.
Кампанія Raytheon вырабляе асноўны радар і сістэму навядзення Patriot, піша WSJ. Распрацоўшчык знішчальнікаў F-16 і рэактыўных зенітных комплексаў HIMARS Lockheed Martin вырабляе ракеты Patriot, а рухавікі для іх робіць Aerojet Rocketdyne.
Поўная батарэя Patriot складаецца з шасці асноўных кампанентаў: генератары, радар, станцыя кіравання, антэны, пускавая ўстаноўка і ракеты-перахопнікі. Усе яны працуюць разам, каб зрабіць паспяховы запуск.
Цяпер чытаюць
Беларуска кліча на вяселле зорку «Універа», які за вайну. Упрэгся ўвесь Threads7
Каментары