Украінскае МЗС заклікала беларусаў не дапусціць размяшчэння расійскай ядзернай зброі
Афіцыйная пазіцыя МЗС Украіны з нагоды заявы Пуціна адносна намераў збудаваць сховішча для расійскай ядзернай зброі на тэрыторыі Беларусі, выкладзена на сайце ведамства.
«Апошнія заявы РФ адносна намераў размясціць на тэрыторыі Беларусі тактычную ядзерную зброю з'яўляюцца чарговым правакацыйным крокам злачыннага пуцінскага рэжыму, які падрывае прынцыпы Дамовы аб нераспаўсюджванні ядзернай зброі, архітэктуру ядзернага раззбраення і сістэму міжнароднай бяспекі ў цэлым», — гаворыцца ў заяве.
У звароце акцэнтуецца, што дзеянні Крамля не могуць не выклікаць занепакоенасць, бо ўжо больш за год працягваецца вайна і пакуль Расія дэманструе сваю няздольнасць перамагаць на полі бою.
«Украіна звяртаецца да беларускага грамадства з заклікам не дапусціць рэалізацыі злачынных намераў па размяшчэнні на тэрыторыі Беларусі ядзернай зброі насуперак яе абавязацельствам па Дамове аб нераспаўсюджванні ядзернай зброі, што яшчэ больш ператворыць гэтую краіну ў закладніка Крамля і будзе мець катастрафічныя наступствы для яе будучыні.
Звяртаемся да дзяржаў «Групы сямі» і Еўрапейскага саюза папярэдзіць беларускія ўлады аб далёкіх наступствах для Беларусі ў выпадку яе згоды размясціць на сваёй тэрыторыі тактычную ядзерную зброю Расіі», — прыводзіцца ў заяве.
Украіна чакае эфектыўных дзеянняў па супрацьдзеянні ядзернаму грузу Крамля з боку Вялікабрытаніі, Кітая, ЗША і Францыі, у тым ліку і як пастаянных членаў Рады Бяспекі ААН, якія нясуць асаблівую адказнасць за недапушчэнне пагроз агрэсіі з выкарыстаннем ядзернай зброі. У заяве гаворыцца пра патрэбу неадкладна склікаць з гэтай мэтай пазачарговае пасяджэнне Рады Бяспекі ААН.
Цяпер чытаюць
23‑гадовага афіцэра брыгады спецназа асудзілі на 19 гадоў за «здраду дзяржаве»13
23‑гадовага афіцэра брыгады спецназа асудзілі на 19 гадоў за «здраду дзяржаве»
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў88
Каментары