Два гады спецслужбісты патрацілі на вывучэнне наладак фэйсбука, каб знайсці там дзірку ў бяспецы, і цяпер шантажуюць гэтым беларускіх айцішнікаў.
Мы паведамлялі пра тое, што беларускія спецслужбы скончылі ідэнтыфікацыю асоб, якія ў гарачыя месяцы 2020-2021 гадоў данацілі грамадскім ініцыятывам. У першую чаргу гаворка ідзе пра «Байсол», але не толькі. А падазраваныя збольшага — заможныя колы праграмістаў.
Крыніцы: Янчэўскі прыдумаў, каб праграмістаў за данаты 2020-га не садзілі, але здзіралі кампенсацыю ў дзесяціразовым памеры
Цяпер праграмістаў масава выклікаюць у КДБ, дзе прымушаюць прызнавацца ў фактах данатаў і выстаўляюць дзесяцікратны рахунак ад памера даната, які трэба выплаціць на карысць лукашэнкаўцаў.
«Наша Ніва» даведалася, якім чынам спецслужбісты атрымалі інфармацыю аб асобах ахвярадаўцаў.
Сэнс у тым, што на адпаведны запыт з боку КДБ беларускія банкі далі спецслужбам інфармацыю толькі аб плацяжах з беларускіх карт у бок Facebook за перыяд са жніўня 2020-га года, калі здарыўся ўсплёск данатаў у фонды на фоне зверстваў лукашэнкаўцаў — тысячам людзей у адзін момант спатрэбілася рэабілітацыя і дапамога.
Але вось нюанс — і банкі, і спецслужбы могуць бачыць толькі перавод у бок фэйсбука з персаналізаванай беларускай карты, але яны не могуць ідэнтыфікаваць, на што канкрэтна пайшлі грошы: сацсетка прапануе масу платных сэрвісаў, такіх як гульні, дадаткі, тавары ў Facebook Marketplace.
Як жа тады зразумець, што чалавек падтрымліваў менавіта «Байсол» ці іншы збор? А не, напрыклад, купляў сабе віртуальны меч ці шыны на машыну?
Толькі інтуітыўна, разумеючы абставіны: наўрад ці ў жніўні-снежні 2020-га праграмісты масава куплялі сабе віртуальныя мячы, — думаюць лукашэнкаўцы.
Каб у гэтым пераканацца і выставіць дзесяцікратны мультыплікатар, праграмістаў і выклікаюць у КДБ, дзе ўсіх просяць зайсці ў свой аккаўнт на фэйсбуку.
І тут пачынаецца тое, чаго можна пазбегнуць толькі праз поўнае выдаленне акаўнта. Аказваецца, у фэйсбуку ёсць дзірка ў бяспецы, якая, калі глядзець на яе вачыма каліфарнійца (Facebook створаны ў Каліфорніі), дзіркай можа і не з'яўляецца, але ў рэжымах дыктатуры можа стаць нагодай для крымінальнага пераследу.
У раздзеле Facebook Pay вашай старонкі захоўваюцца даныя пра ўсе плацяжы карыстальніка, і выдаліць іх адтуль ніяк немагчыма — такой опцыі проста не існуе. Можна толькі атрымаць чэк аб плацяжы, што па-чорнаму іранічна ў беларускіх абставінах.
Такім чынам, калі лукашэнкаўцы атрымліваюць фізічны доступ да фэйсбук-профілю падазраванага, таму застаецца толькі прызнаць факт падтрымкі фондаў і пагадзіцца на выплату па 10-кратным мультыплікатары на карысць лукашэнкаўцаў.
Схаваць гісторыю сваіх плацяжоў можна, толькі калі цалкам выдаліць свой акаўнт, але спецслужбы будуць працягваць бачыць факт пераводу грошай з вашай беларускай карткі ў бок фэйсбука, таму прыйдзецца тлумачыць, што ж насамрэч вы аплочвалі, і тлумачыць, чаму цяпер таго профілю не існуе.
Цяпер чытаюць
Стала вядомае імя другой беларускі, якая згінула пад селем у Непале. Гэта 24‑гадовая Ірына з журфака БДУ7
Стала вядомае імя другой беларускі, якая згінула пад селем у Непале. Гэта 24‑гадовая Ірына з журфака БДУ
Электронную «Беларускую энцыклапедыю», створаную як прастору «верагодных ведаў пра Беларусь», ціха ліквідавалі разам з рэдакцыяй. Купу артыкулаў перадалі Гігіну66
Каментары