У Віцебску мужчына паўгадзіны катаваў жонку распаленай плойкай, нанёс ёй 18 удараў. Пакаранне — 1,5 года калоніі
У Віцебску грузчык аднаго з гандлёвых прадпрыемстваў жорстка збіў сваю жонку. Адначасова 26-гадовы мужчына прыкладна паўгадзіны катаваў жанчыну электрычнай плойкай, выбіваючы з яе прызнанне ў здрадзе, паведамляе сайт vitebsk.biz.
Муж і жонка жылі разам каля 6 гадоў. У іх трое непаўналетніх дзяцей, у дачыненні да якіх яны пазбаўленыя бацькоўскіх правоў за злоўжыванне спіртным. Муж жонку пастаянна збіваў, але яна яго, як часта водзіцца ў такіх сем'ях, абараняла і выгароджвала.
Аднойчы жонка зламала руку і, як расказаў пракурор аддзела пракуратуры Віцебскай вобласці Антон Гарохаў, былі ўсе падставы падазраваць, што да гэтай траўмы датычны муж пацярпелай. Але жанчына настойвала — яна атрымала яе пры падзенні па сваёй віне.
Аднойчы пасля чарговага сумеснага распіцця гарэлкі здарылася новая сямейная сварка, пасля якой жанчына, пакрыўдзіўшыся, пайшла на 2 тыдні жыць да бацькоў. А калі вярнулася, то муж абвінаваціў яе ў сужонскай здрадзе. А калі яна тое адмаўляла, то вырашыў выбіць прызнанне сілай.
«Абвінавачаны уключыў у электрычную разетку плойку, пачакаў, пакуль тэмпература награвання павысіцца, — расказаў пракурор. — Пасля распаленай плойкай на працягу паўгадзіны ён прыпальваў жанчыне рукі, твар і сцягно. А каб ахвяра не вырвалася, абвінавачаны ўтрымліваў яе за зламаную руку. Адначасова ён яе збіваў: нанёс 18 удараў.
Як дадаў Антон Гарохаў, падчас расследавання крымінальнай справы пацярпелая ўсімі спосабамі выгароджвала мужчыну, а калі ўсе факты здзекаў былі даказаныя, то прасіла яго строга не караць.
У выніку мужчына прысуджаны да пазбаўлення волі на 1,5 года з адбываннем пакарання ў папраўчай калоніі ва ўмовах агульнага рэжыму.
Варта адзначыць, што за негатыўныя каментары ў сацсетках на адрас прадстаўніка ўлады ў Беларусі лёгка можна атрымаць столькі сама ці нават больш.
Цяпер чытаюць
«Калі б не «Вясна-1996, мы б былі Татарстанам». 30 гадоў таму беларусы ўжо пратэставалі супраць Лукашэнкі і Расіі — як гэта было11
Каментары